ഡൽഹിയിൽ നടന്ന ‘തിരംഗ മാർച്ചി’നിടെ കരുതല് തടങ്കലിലായ കോക്ക്റോച്ച് ജനതാ പാർട്ടി (സി.ജെ.പി) സ്ഥാപകൻ അഭിജീത് ദിപ്കെയെ ഉടൻ കോടതിയിൽ ഹാജരാക്കുമെന്ന് ഡൽഹി പോലീസ് അറിയിച്ചു. ജാഫർപൂർ കലാൻ പോലീസ് സ്റ്റേഷനിൽ പാർപ്പിച്ചിരിക്കുന്ന അദ്ദേഹത്തെ റിമാൻഡ് ആവശ്യങ്ങൾക്കായി മജിസ്‌ട്രേറ്റിന് മുന്നിൽ എത്തിക്കാനാണ് പോലീസിന്റെ നീക്കം. രാജ്യതലസ്ഥാനത്തെ ക്രമസമാധാന നില തകരാതിരിക്കാൻ മുൻകരുതൽ നടപടിയുടെ ഭാഗമായാണ് അദ്ദേഹത്തെ കസ്റ്റഡിയിലെടുത്തതെന്ന് പോലീസ് വൃത്തങ്ങൾ വ്യക്തമാക്കുന്നു.
അതേസമയം മണ്ഡി ഹൗസ് മേഖലയിൽ നിന്ന് കസ്റ്റഡിയിലെടുത്ത ഐസ (AISA) അധ്യക്ഷ നേഹ ബോറയെ പോലീസ് ചോദ്യം ചെയ്ത ശേഷം വിട്ടയച്ചു. ഡൽഹിയിലെ നിരോധനാജ്ഞ ലംഘിച്ച് ഒത്തുകൂടാൻ ശ്രമിച്ചതിനാണ് നേഹ ബോറ ഉൾപ്പെടെയുള്ള നിരവധി പ്രവർത്തകരെ പോലീസ് തടഞ്ഞുവെച്ചിരുന്നത്. കസ്റ്റഡിയിലായ മറ്റ് പ്രമുഖ പ്രതിഷേധക്കാരുടെ വ്യക്തിഗത വിവരങ്ങൾ ശേഖരിച്ച ശേഷമാണ് ഘട്ടംഘട്ടമായി വിട്ടയക്കാൻ തീരുമാനിച്ചത്.
പ്രതിഷേധ മാർച്ചിന് ആഹ്വാനം നൽകിയ മുൻനിര നേതാക്കൾക്കെതിരെ നടപടി ശക്തമാക്കുമ്പോഴും നഗരത്തിൽ പോലീസിന്റെ കനത്ത ജാഗ്രത തുടരുകയാണ്. ഡൽഹിയിലെ കൊണാട്ട് പ്ലേസ്, മണ്ഡി ഹൗസ് എന്നിവിടങ്ങളിൽ ഏർപ്പെടുത്തിയ സുരക്ഷാ ക്രമീകരണങ്ങളും ഗതാഗത നിയന്ത്രണങ്ങളും ഭാഗികമായി പിൻവലിച്ചിട്ടുണ്ട്. സമാധാനപരമായ അന്തരീക്ഷം പുനഃസ്ഥാപിക്കാൻ പൊതുജനങ്ങൾ സഹകരിക്കണമെന്ന് ഡൽഹി പോലീസ് ആവശ്യപ്പെട്ടു.
