52-ാം വയസ്സിലും ബാറ്റുകൊണ്ട് വിസ്മയം തീർത്ത് വെസ്റ്റ് ഇൻഡീസ് ഇതിഹാസം ശിവനാരായൺ ചന്ദർപോൾ. വേൾഡ് ചാമ്പ്യൻഷിപ്പ് ഓഫ് ലെജൻഡ്സ് (WCL) 2026 രണ്ടാം സെമിഫൈനലിൽ ഓസ്ട്രേലിയ ചാമ്പ്യൻസിനെതിരെ വെറും 27 പന്തിൽ 41 റൺസ് നേടി ചന്ദർപോൾ തിളങ്ങി. താരത്തിന്റെ വെടിക്കെട്ട് പ്രകടനത്തിന്റെ കരുത്തിൽ വെസ്റ്റ് ഇൻഡീസ് ചാമ്പ്യൻസ് അഞ്ച് വിക്കറ്റിന് വിജയിച്ച് ഫൈനലിൽ പ്രവേശിച്ചു.
ക്രിസ് ഗെയ്ൽ കളിക്കാതിരുന്നതിനെത്തുടർന്ന് പ്ലേയിങ് ഇലവനിൽ ഇടം ലഭിച്ച ചന്ദർപോൾ തന്റെ പഴയകാല ബാറ്റിങ് മികവ് വീണ്ടും പുറത്തെടുത്തു. മൂന്ന് ഫോറും മൂന്ന് സിക്‌സും ഉൾപ്പെട്ട ഇന്നിങ്‌സിൽ 151.85 ആയിരുന്നു സ്ട്രൈക്ക് റേറ്റ്. ഓസ്‌ട്രേലിയൻ ബൗളർ ബെൻ ഹിൽഫൻഹോസിന്റെ ഒരോവറിൽ സിക്‌സ്, ഫോർ, സിക്‌സ് എന്നിങ്ങനെ തുടർച്ചയായ മൂന്ന് പന്തുകളിൽ റൺസ് അടിച്ചുകൂട്ടിയ ചന്ദർപോൾ ആരാധകരെ ആവേശത്തിലാഴ്ത്തി.
172 റൺസ് വിജയലക്ഷ്യം പിന്തുടർന്ന വെസ്റ്റ് ഇൻഡീസിനായി ചന്ദർപോളും ചാഡ്‌വിക് വാൾട്ടണും ചേർന്ന മൂന്നാം വിക്കറ്റ് കൂട്ടുകെട്ട് നിർണായകമായി. ഇരുവരും ചേർന്ന് 96 റൺസ് കൂട്ടിച്ചേർത്തു. വാൾട്ടൺ പുറത്താകാതെ 87 റൺസ് നേടി ടീമിന്റെ വിജയത്തിൽ നിർണായക പങ്കുവഹിച്ചു. ഇരുവരുടെയും മികവിൽ വെസ്റ്റ് ഇൻഡീസ് അഞ്ച് വിക്കറ്റ് ശേഷിക്കെ ലക്ഷ്യം മറികടന്നു.
ഈ വിജയത്തോടെ വെസ്റ്റ് ഇൻഡീസ് ചാമ്പ്യൻസ് ഞായറാഴ്ച നടക്കുന്ന ഫൈനലിൽ ഇംഗ്ലണ്ട് ചാമ്പ്യൻസിനെ നേരിടും. 52-ാം വയസ്സിലും മികച്ച ബാറ്റിങ് പ്രകടനം പുറത്തെടുത്ത ചന്ദർപോൾ, പ്രതിഭയ്ക്ക് പ്രായം തടസ്സമല്ലെന്ന് വീണ്ടും തെളിയിച്ചു. ക്ലാസ് ഒരിക്കലും മങ്ങില്ലെന്നും പ്രായം വെറും സംഖ്യ മാത്രമാണെന്നും ഓർമിപ്പിക്കുന്നതാണ് വെസ്റ്റ് ഇൻഡീസ് ഇതിഹാസത്തിന്റെ ഈ ഇന്നിങ്‌സ്.
