വെസ്റ്റ് ഇൻഡീസിനെതിരായ അഞ്ച് മത്സരങ്ങളടങ്ങിയ ട്വന്റി20 പരമ്പരയിലെ നിർണായകമായ അവസാന മത്സരത്തിന് മുന്നോടിയായി ഗുഢാർത്ഥമുള്ള ഇൻസ്റ്റാഗ്രാം സ്റ്റോറിയുമായി ഇന്ത്യൻ യുവ ഓപ്പണർ വൈഭവ് സൂര്യവംശി. പരമ്പരയിലെ ആദ്യ നാല് മത്സരങ്ങളിലും ബെഞ്ചിലിരിക്കേണ്ടി വന്ന 15-കാരനായ ഈ യുവതാരത്തിന് ഇതുവരെ ഒരു മത്സരത്തിലും കളിക്കാൻ അവസരം ലഭിച്ചിട്ടില്ല. അഭിഷേക് ശർമ്മ, സഞ്ജു സാംസൺ എന്നിവരടങ്ങിയ ഓപ്പണിംഗ് ജോഡിയെയാണ് ടീം മാനേജ്‌മെന്റ് നിലവിൽ പിന്തുണയ്ക്കുന്നത്.
തുടർച്ചയായ നാല് മത്സരങ്ങളിലും അവസരം നിഷേധിക്കപ്പെട്ടതിന് പിന്നാലെയാണ് ബാറ്റ് ഉയർത്തിപ്പിടിച്ചു നിൽക്കുന്ന സ്വന്തം ചിത്രം പങ്കുവെച്ച് വൈഭവ് രംഗത്തെത്തിയത്. “സ്റ്റിൽ ബിലീവിങ് (ഇപ്പോഴും വിശ്വസിക്കുന്നു) എന്ന രണ്ടു വാക്കുകളടങ്ങിയ അടിക്കുറിപ്പോടെയാണ് താരം ചിത്രം പങ്കുവെച്ചിരിക്കുന്നത്. 2026-ലെ ഏഷ്യൻ ഗെയിംസിലാണ് വൈഭവ് സൂര്യവംശി അവസാനമായി ഇന്ത്യൻ കുപ്പായത്തിൽ കളത്തിലിറങ്ങിയത്.
ശ്രീലങ്കയ്ക്കും പാകിസ്ഥാനുമെതിരായ മത്സരങ്ങളിൽ യഥാക്രമം 21 പന്തിൽ 38 റൺസും 9 പന്തിൽ 15 റൺസും താരം നേടിയിരുന്നു. ഫൈനലിൽ പാകിസ്ഥാനെ 19 റൺസിന് പരാജയപ്പെടുത്തി ശ്രേയസ് അയ്യരുടെ നേതൃത്വത്തിലുള്ള ഇന്ത്യൻ സംഘം സ്വർണ്ണമെഡൽ സ്വന്തമാക്കുകയും ചെയ്തിരുന്നു.
അതേസമയം, നാലാം ട്വന്റി20 മത്സരത്തിൽ ഇന്ത്യയെ 24 റൺസിന് പരാജയപ്പെടുത്തി വെസ്റ്റ് ഇൻഡീസ് പരമ്പരയിൽ 2-2 എന്ന നിലയിൽ ഒപ്പമെത്തിയിരുന്നു. പരമ്പരയിലെ വിജയികളെ നിർണ്ണയിക്കുന്ന അഞ്ചാമത്തെയും അവസാനത്തെയും മത്സരം ഒക്ടോബർ 17 ശനിയാഴ്ച ബെംഗളൂരുവിലെ എം. ചിന്നസ്വാമി സ്റ്റേഡിയത്തിൽ വച്ചാണ് നടക്കുന്നത്. ഇന്ത്യ-വെസ്റ്റ് ഇൻഡീസ് അഞ്ചാം ട്വന്റി20 മത്സരത്തിന്റെ പ്ലേയിംഗ് ഇലവനിൽ വൈഭവ് സൂര്യവംശിയെ ഉൾപ്പെടുത്താൻ തനിക്ക് വലിയ ആഗ്രഹമുണ്ടെന്ന് മുൻ ഇന്ത്യൻ അസിസ്റ്റന്റ് കോച്ച് അഭിഷേക് നായർ പറഞ്ഞു. വൈഭവിനെ ടീമിൽ ഉൾപ്പെടുത്തുകയാണെങ്കിൽ താരം സ്വാഭാവിക സ്ഥാനമായ ഓപ്പണിംഗിൽ തന്നെ ബാറ്റ് ചെയ്യണമെന്ന് അദ്ദേഹം ഊന്നിപ്പറഞ്ഞു. എന്നാൽ വൈഭവിനെ ടീമിലെത്തിക്കാൻ നിലവിലെ ബാറ്റിംഗ് നിരയിൽ മാറ്റങ്ങൾ വരുത്താൻ താൻ ആഗ്രഹിക്കുന്നില്ലെന്നും ജിയോ ഹോട്ട്സ്റ്റാറിലെ ‘ഗെയിം പ്ലാൻ’ എന്ന പരിപാടിയിൽ സംസാരിക്കവെ അഭിഷേക് നായർ വ്യക്തമാക്കി.
പ്രിഫേർഡ് ബാറ്റിംഗ് പൊസിഷനിൽ മാറ്റം വരുത്താതെ ബൗളിംഗിൽ മാത്രം മാറ്റം വരുത്തി ബാറ്റിംഗ് ഓൾറൗണ്ടർ നമൻ ധീറിന് പകരം ഇടംകൈയൻ സ്പിന്നർ കുൽദീപ് യാദവിനെ ടീമിലേക്ക് കൊണ്ടുവരണമെന്നാണ് അദ്ദേഹത്തിന്റെ അഭിപ്രായം.ഇതുവരെ കളിച്ച എട്ട് ട്വന്റി20 അന്താരാഷ്ട്ര മത്സരങ്ങളിൽ നിന്ന് 186.38 സ്ട്രൈക്ക് റേറ്റിൽ 246 റൺസാണ് വൈഭവ് സൂര്യവംശി അടിച്ചുകൂട്ടിയിട്ടുള്ളത്.
