2027 ഏകദിന ലോകകപ്പിനുള്ള ഇന്ത്യൻ ടീമിന്റെ പദ്ധതികളിൽ നിന്ന് സ്റ്റാർ ഓൾറൗണ്ടർ രവീന്ദ്ര ജഡേജ പുറത്തായതായി റിപ്പോർട്ട്. ന്യൂസിലൻഡിനെതിരായ ഏകദിന പരമ്പരയ്ക്കുള്ള ഇന്ത്യൻ ടീമിൽ ജഡേജയ്ക്ക് ഇടം ലഭിക്കാതിരുന്നതോടെയാണ് താരത്തിന്റെ ഭാവിയെക്കുറിച്ചുള്ള ചർച്ചകൾ ശക്തമായത്. 2027 ലോകകപ്പിന് മുന്നോടിയായി മറ്റ് താരങ്ങൾക്ക് കൂടുതൽ അവസരങ്ങൾ നൽകാനാണ് സെലക്ടർമാരും ടീം മാനേജ്‌മെന്റും ആലോചിക്കുന്നതെന്നാണ് റിപ്പോർട്ടുകൾ.
വെസ്റ്റ് ഇൻഡീസിനെതിരായ ഏകദിന പരമ്പരയിലെ മൂന്നാം മത്സരത്തിൽ ജഡേജ കളിക്കാതിരുന്നതിനെ വിശ്രമമെന്നാണ് ക്യാപ്റ്റൻ ഗിൽ വിശേഷിപ്പിച്ചത്. മൂന്ന് മത്സരങ്ങൾ മാത്രമുള്ള പരമ്പരയിൽ പുറത്തിരിക്കുന്ന താരങ്ങൾക്ക് അവസരം നൽകുക പ്രയാസമാണെന്നും അതിനാലാണ് ജഡേജയ്ക്ക് വിശ്രമം അനുവദിച്ചതെന്നും ഗിൽ വിശദീകരിച്ചിരുന്നു. എന്നാൽ ന്യൂസിലൻഡിനെതിരായ പരമ്പരയ്ക്കുള്ള ടീമിൽ നിന്നും താരം ഒഴിവാക്കപ്പെട്ടതോടെ ഈ വിശദീകരണത്തെക്കുറിച്ചും ചോദ്യങ്ങൾ ഉയരുകയാണ്.
37 വയസ്സുള്ള ജഡേജ ഇന്ത്യൻ ടീമിനായി മൂന്ന് ഫോർമാറ്റുകളിലും നിർണായക സംഭാവനകൾ നൽകിയ താരമാണ്. എന്നാൽ ഏകദിനത്തിൽ സമീപകാലത്തെ പ്രകടനം പ്രതീക്ഷയ്ക്കൊത്തതല്ലെന്നാണ് കണക്കുകൾ സൂചിപ്പിക്കുന്നത്. വെസ്റ്റ് ഇൻഡീസിനെതിരായ ആദ്യ രണ്ട് മത്സരങ്ങളിൽ രണ്ട് വിക്കറ്റുകൾ മാത്രമാണ് ജഡേജയ്ക്ക് നേടാനായത്. ബാറ്റിങ്ങിലും കാര്യമായ അവസരം ലഭിച്ചിരുന്നില്ല.
2023 ഏകദിന ലോകകപ്പിന് ശേഷം ഇന്ത്യ കളിച്ച 32 ഏകദിനങ്ങളിൽ 15 എണ്ണത്തിൽ മാത്രമാണ് ജഡേജയ്ക്ക് അവസരം ലഭിച്ചത്. ഈ മത്സരങ്ങളിൽ 47.92 ശരാശരിയിൽ 14 വിക്കറ്റുകളാണ് താരം നേടിയത്. ഓവർ ഒന്നിന് ശരാശരി 5.20 റൺസായിരുന്നു വഴങ്ങിയത്. ഇന്ത്യയ്ക്കായി കളിച്ച 142 ഏകദിന ഇന്നിങ്‌സുകളിൽ 13 തവണ മാത്രമാണ് ജഡേജ അർധസെഞ്ചുറി പിന്നിട്ടത്. 2025 ചാമ്പ്യൻസ് ട്രോഫിക്ക് ശേഷം എട്ട് മത്സരങ്ങളിൽ നിന്ന് അഞ്ച് വിക്കറ്റുകൾ മാത്രമാണ് താരത്തിന്റെ സമ്പാദ്യം. ഈ കാലയളവിൽ ഓവർ ഒന്നിന് ആറ് റൺസിലധികം വഴങ്ങുകയും ചെയ്തു.
ജഡേജയ്ക്ക് പകരം അക്ഷർ പട്ടേലിന് കൂടുതൽ മുൻഗണന ലഭിക്കുന്നതായും റിപ്പോർട്ടുകൾ പറയുന്നു. 19 മത്സരങ്ങളിൽ നിന്ന് 21 വിക്കറ്റുകൾ നേടിയ അക്ഷറിന്റെ എക്കോണമി നിരക്ക് 4.53 ആണ്. മധ്യനിരയിൽ ബാറ്റിങ്ങിലും സംഭാവന നൽകാൻ കഴിയുന്ന അക്ഷറിന് നാലാം നമ്പർ മുതൽ ഏഴാം നമ്പർ വരെ വ്യത്യസ്ത സ്ഥാനങ്ങളിൽ കളിക്കാനാകുമെന്നതും ടീം മാനേജ്‌മെന്റിന് അനുകൂല ഘടകമാണ്. വാഷിങ്ടൺ സുന്ദർ, ഹർഷ് ദുബെ, ഷഹബാസ് അഹമ്മദ് തുടങ്ങിയ താരങ്ങൾക്കും വരും മത്സരങ്ങളിൽ അവസരം ലഭിച്ചേക്കുമെന്നാണ് റിപ്പോർട്ട്.
2027 ലോകകപ്പിനുള്ള പദ്ധതികളിൽ ജഡേജയില്ലെന്നും ഇടംകൈയൻ സ്പിൻ ഓൾറൗണ്ടർമാരുടെ പരിഗണനയിൽ അക്ഷർ മുന്നിലാണെന്നും സെലക്ഷൻ സമിതിയുമായി ബന്ധപ്പെട്ട ഒരു വൃത്തത്തെ ഉദ്ധരിച്ചുള്ള റിപ്പോർട്ടിൽ പറയുന്നു. എന്നാൽ ജഡേജയെ ഏകദിന ടീമിൽ നിന്ന് സ്ഥിരമായി ഒഴിവാക്കിയതായി ബിസിസിഐ ഔദ്യോഗികമായി പ്രഖ്യാപിച്ചിട്ടില്ല.
ജഡേജയെപ്പോലൊരു പരിചയസമ്പന്നനായ ഓൾറൗണ്ടറെ മാറ്റിനിർത്തുന്നത് എളുപ്പമുള്ള തീരുമാനമല്ല. ബാറ്റിങ്, ബൗളിങ്, ഫീൽഡിങ് എന്നീ മൂന്ന് മേഖലകളിലും സംഭാവന നൽകാനുള്ള കഴിവ് താരത്തിനുണ്ട്. അതേസമയം, ലോകകപ്പിന് മുന്നോടിയായി ടീമിന്റെ മധ്യ ഓവറുകളിലെ വിക്കറ്റ് വേട്ടയും ബൗളിങ് നിയന്ത്രണവും മെച്ചപ്പെടുത്തേണ്ടതിന്റെ ആവശ്യകതയും സെലക്ടർമാരുടെ തീരുമാനത്തെ സ്വാധീനിച്ചേക്കാം. യുവതാരങ്ങൾക്ക് കൂടുതൽ അവസരം നൽകുന്ന നീക്കം ജഡേജയുടെ ഏകദിന ഭാവിയെ എങ്ങനെ ബാധിക്കുമെന്നതാണ് ഇനി ശ്രദ്ധേയം.
