നെതർലാൻഡിലെ ഹേഗിൽ നടന്ന ഇന്ത്യ-നെതർലാൻഡ്സ് ബിസിനസ് ഫോറത്തിൽ സംസാരിക്കവെ, ഇന്ത്യയുടെ വളർന്നുവരുന്ന വിപണി മാത്രമല്ല, രാജ്യത്തിന്റെ സ്വതന്ത്ര വ്യാപാര കരാറുകളും സാങ്കേതികവിദ്യ സ്വീകാര്യതയും നിർമ്മാണ മേഖലയിലെ അവസരങ്ങളും പ്രയോജനപ്പെടുത്തി നിക്ഷേപം നടത്താൻ ഡച്ച് ബിസിനസ്സ് സമൂഹത്തോട് കേന്ദ്ര വാണിജ്യ-വ്യവസായ മന്ത്രി പിയൂഷ് ഗോയൽ ആഹ്വാനം ചെയ്തു. ജർമ്മനിയിലും നെതർലാൻഡിലുമായി നടത്തുന്ന സന്ദർശന വേളയിലാണ് ഇന്ത്യയുടെ നിക്ഷേപ സാധ്യതകൾ മന്ത്രി വിശദീകരിച്ചത്.
കഴിഞ്ഞ നാലര വർഷത്തിനിടയിൽ ഒൻപത് സ്വതന്ത്ര വ്യാപാര കരാറുകളിൽ ഇന്ത്യ ഒപ്പുവെച്ചിട്ടുണ്ടെന്നും, കൂടുതൽ കരാറുകൾ ചർച്ചയിലാണെന്നും അദ്ദേഹം ചൂണ്ടിക്കാട്ടി. ആഗോള സമ്പദ്‌വ്യവസ്ഥയുടെ വലിയൊരു ഭാഗം ഉൾക്കൊള്ളുന്ന വിപണികളിലേക്ക് പ്രവേശനം നേടാൻ ഈ കരാറുകൾ സഹായിക്കും. അടുത്ത രണ്ട് പതിറ്റാണ്ടുകൾക്കുള്ളിൽ ഇന്ത്യയുടെ ജിഡിപി 4 ട്രില്യൺ ഡോളറിൽ നിന്ന് 30 ട്രില്യൺ ഡോളറായി ഉയരുമെന്നാണ് പ്രതീക്ഷിക്കുന്നത്. ബിസിനസ് ഫോറത്തിൽ സംസാരിക്കവെ, ഇന്ത്യയിലെ തൊഴിലാളികളുടെ കഠിനാധ്വാന സന്നദ്ധതയെയും ആത്മസമർപ്പണത്തെയും കുറിച്ച് നടത്തിയ പരാമർശമാണ് “Nobody in India will tell you it’s five o’clock” എന്നത്. ഡച്ച് നിക്ഷേപകരെയും വ്യവസായ പ്രമുഖരെയും ഇന്ത്യയിലേക്ക് ആകർഷിക്കുന്നതിന്റെ ഭാഗമായാണ് അദ്ദേഹം ഈ കാര്യം വ്യക്തമാക്കിയത്.
നിർമ്മാണം, ഗവേഷണ-വികസന പ്രവർത്തനങ്ങൾ, അടിസ്ഥാന സൗകര്യങ്ങൾ, പുനരുപയോഗ ഊർജ്ജം, ലോജിസ്റ്റിക്സ്, ഡിജിറ്റൽ സാങ്കേതികവിദ്യകൾ, സെമികണ്ടക്ടറുകൾ, ഗ്രീൻ ഹൈഡ്രജൻ തുടങ്ങിയ മേഖലകളിൽ ഡച്ച് കമ്പനികൾക്ക് വലിയ നിക്ഷേപ സാധ്യതകളുണ്ടെന്ന് മന്ത്രി വ്യക്തമാക്കി. കൂടാതെ, ഫുഡ് പ്രൊസസിങ് മേഖലയിലെ നിക്ഷേപം കർഷകർക്ക് മികച്ച വിലയും കൂടുതൽ വിപണി സാധ്യതയും ഉറപ്പാക്കാൻ സഹായിക്കുമെന്നും അദ്ദേഹം കൂട്ടിച്ചേർത്തു.
