സിപിഎമ്മിന്റെ നിര്‍ണായക പോളിറ്റ് ബ്യൂറോ ഇന്ന് ഡൽഹിയിൽ ആരംഭിക്കും. കേരളവും പശ്ചിമ ബംഗാളും ഉള്‍പ്പടെയുള്ള സംസ്ഥാനങ്ങളിലെ നിയമസഭാ തിരഞ്ഞെടുപ്പ് ഫലം അവലോകനം ചെയ്യുന്നതിനായാണ് പിബി ചേരുന്നത്.
കേരളം, പശ്ചിമബംഗാള്‍, അസ്സാം, തമിഴ്‌നാട്, പുതുച്ചേരി എന്നീ സംസ്ഥാനങ്ങളിലെ തെരഞ്ഞെടുപ്പ് ഫലങ്ങളുടെ അവലോകനമാണ് പോളിറ്റ് ബ്യൂറോ യോഗത്തിന്റെ പ്രധാന അജണ്ട. കേരളം ഒഴികെയുള്ള സംസ്ഥാനങ്ങളില്‍ ദയനീയ പ്രകടനമായിരുന്നു സിപിഎമ്മിന്റേത്. പശ്ചിമ ബംഗാളില്‍ ഇടത്-കോണ്‍ഗ്രസ് സഖ്യത്തിന് ചുക്കാന്‍ പിടിച്ച സീതാറാം യെച്ചൂരിക്കെതിരെ പോളിറ്റ് ബ്യൂറോ യോഗത്തില്‍ കടുത്ത വിമര്‍ശനമുണ്ടാവും.
പാര്‍ട്ടി കോണ്‍ഗ്രസ് പാസാക്കിയ രാഷ്ട്രീയ അടവുനയം ജനറല്‍ സെക്രട്ടറി തന്നെ അട്ടിമറിച്ചെന്ന ആരോപണമാകും യെച്ചൂരി യോഗത്തില്‍ നേരിടേണ്ടി വരിക. അതേസമയം ബംഗാളില്‍ കോണ്‍ഗ്രസുമായുള്ള സഹകരണം തുടരണമെന്ന നിലപാടാണ് ബംഗാള്‍ ഘടകത്തിന്റേത്.
മുന്‍ പ്രതിപക്ഷ നേതാവ് വിഎസ് അച്യുതാനന്ദന് നല്‍കേണ്ട പദവികളെ സംബന്ധിച്ച് യോഗത്തില്‍ ധാരണയാവും. ക്യാബിനറ്റ് റാങ്കോടെ സര്‍ക്കാരിന്റെ ഉപദേശകന്‍, എല്‍ഡിഎഫ് ചെയര്‍മാന്‍ എന്നീ പദവികളാണ് പാര്‍ട്ടി പരിഗണിക്കുന്നത്. സിപിഎം സംസ്ഥാന സെക്രട്ടേറിയേറ്റില്‍ ഉള്‍പ്പെടുത്തണമെന്നും വിഎസ് പാര്‍ട്ടി നേതൃത്വത്തോട് ആവശ്യപ്പെട്ടിട്ടുണ്ട്. വിഎസ് പദവികള്‍ ആവശ്യപ്പെട്ട് തനിക്ക് കുറിപ്പ് നല്‍കിയെന്ന് പാര്‍ട്ടി ജനറല്‍ സെക്രട്ടറി സീതാറാം യെൂച്ചൂരി തന്നെ കഴിഞ്ഞ ദിവസം തുറന്നുപറഞ്ഞത് വി എസിന് ക്ഷീണമായിരുന്നു.
അതേസമയം സംസ്ഥാന സര്‍ക്കാരിന് ഉപദേശകന്‍ വരുന്നതില്‍ തെറ്റില്ലെന്ന് മുഖ്യമന്ത്രി പിണറായി വിജയന്‍ അഭിപ്രായപ്പെട്ടു. മുഖ്യമന്ത്രി എന്ന നിലയില്‍ താനൊരു പുതുമുഖമാണെന്നും അതിനാല്‍ കാര്യങ്ങള്‍ നല്ല രീതിയില്‍ നടത്താന്‍ ഉപദേശം വേണമെന്നും പിണറായി പറഞ്ഞു.
Discussion about this post