കാസര്‍ഗോഡ്: സംസ്ഥാനത്ത് തീവ്രവാദ ബന്ധം സംശയിക്കുന്ന സംഘടനകള്‍ രഹസ്യാന്വേഷണ വിഭാഗത്തിന്റെ നിരീക്ഷണത്തില്‍. ഫെയ്‌സ് ബുക്ക്, വാട്‌സ് ആപ്പ് തുടങ്ങിയ നവമാധ്യമ കൂട്ടായ്മകളും കേന്ദ്രസംസ്ഥാന രഹസ്യാന്വേഷണ വിഭാഗം നിരീക്ഷണം ശക്തമാക്കിയിരിക്കുകയാണ്. തീവ്രവാദബന്ധമുണ്ടെന്ന സൂചനകളുള്ള പത്തോളം സംഘടനകളുടെ പ്രവര്‍ത്തനങ്ങളും രഹസ്യാന്വേഷണ വിഭാഗം നിരീക്ഷിക്കുന്നുണ്ട്. ഇതില്‍ ചില സംഘടനകള്‍ക്ക് ഐ.എസുമായി ബന്ധമുള്ളതായി സൂചനയുണ്ട്. വിദേശത്തുനിന്നടക്കം സംഘടനകള്‍ക്ക് ലഭിക്കുന്ന സാമ്പത്തിക സഹായങ്ങളെ കുറിച്ചും കേന്ദ്ര രഹസ്യാന്വേഷണ വിഭാഗങ്ങള്‍ അന്വേഷിക്കുന്നുണ്ട്.
കോഴിക്കോട് ആസ്ഥാനമായി സംസ്ഥാനത്തിന്റെ വിവിധ ഭാഗങ്ങളില്‍ വിദ്യാഭ്യാസ സ്ഥാപനങ്ങള്‍ നടത്തുന്ന പീസ് എഡ്യുക്കേഷണല്‍ ഫൗണ്ടേഷന്റെ പ്രവര്‍ത്തനങ്ങളെക്കുറിച്ചും കേന്ദ്ര രഹസ്യാന്വേഷണ വിഭാഗം അന്വേഷണം ആരംഭിച്ചിട്ടുണ്ട്. കാണാതായ ഉടുംമ്പതല സ്വദേശി അബ്ദുള്‍ റാഷിദ് ഈ സംഘടനയുടെ കീഴില്‍ തൃക്കരിപ്പൂരില്‍ പ്രവര്‍ത്തിക്കുന്ന സ്‌കൂളിലെ അഡ്മിനിസ്‌ട്രേറ്ററായി ജോലി ചെയ്തിരുന്നു. ഇയാള്‍ സംസ്ഥാനത്തുനിന്ന ഐ.എസിലേക്ക് അംഗങ്ങളെ റിക്രൂട്ട് ചെയ്യുന്നതിന് നേതൃത്വം നല്‍കിയതായി തെളിഞ്ഞിട്ടുണ്ട്. ഈ സാഹചര്യത്തിലാണ് പീസ് എഡ്യുക്കേഷണല്‍ ഫൗണ്ടേഷനെ കുറിച്ച് അന്വേഷണം നടക്കുന്നത്.
കാസര്‍ഗോഡ് ജില്ലയിലെ ചില പ്രദേശങ്ങളില്‍ തീവ്രവാദ പ്രവര്‍ത്തനങ്ങള്‍ക്കു പ്രചോദനം നല്‍കുന്ന രാത്രി കാല പഠന ക്ലാസ്‌സുകള്‍ നടക്കുന്നതായും പോലീസിന് വിവരം ലഭിച്ചിട്ടുണ്ട്. ഇതിനെക്കുറിച്ചും രഹസ്യാന്വേഷണ വിഭാഗം അന്വേഷിക്കുന്നുണ്ട്. മാവോയിസ്റ്റുകള്‍ അടക്കമുള്ള തീവ്രവാദികളുടെ സാന്നിധ്യം സംശയിക്കുന്ന പ്രദേശങ്ങളിലും പോലീസ് നിരീക്ഷണം ശക്തമാക്കിയിട്ടുണ്ട്. വിവിധ മനുഷ്യാവകാശ സംഘടനകളുമായി ബന്ധപ്പെട്ട് പ്രവര്‍ത്തിക്കുന്ന ചിലരേയും രഹസ്യാന്വേഷണ വിഭാഗം നിരീക്ഷിക്കുന്നുണ്ട്.
Discussion about this post