ചണ്ഡീഗഡ്: പീഡനക്കേസില്‍ അറസ്റ്റിലായ മുന്‍ എ എ പി മന്ത്രി സന്ദീപ് കുമാറിനെ മഹാത്മാഗാന്ധിയോടുപമിച്ച എ എ പി നേതാവ് അശുതോഷിനെ പുറത്താക്കണമെന്നാവശ്യപ്പെട്ട് പാര്‍ട്ടിയില്‍ അമര്‍ഷം ഉയരുന്നു. പഞ്ചാബിലെ എഎപി നേതാവ് ദേവേന്ദ്ര സിംഗ് സെഹ്രാവത് ആണ് അശുതോഷിനെതിരെ രൂക്ഷവിമര്‍ശനവുമായി രംഗത്തെത്തിയത്.
സ്വരാജ് എന്ന സന്ദേശമുയര്‍ത്തി ജനങ്ങളിലേക്കെത്തിയ പാര്‍ട്ടിയാണ് എഎപി യെന്നും എന്നാല്‍ പാര്‍ട്ടി അതിന്റെ നയങ്ങളില്‍ നിന്ന് വ്യതിചലിക്കുകയാണെന്നും സെഹ്രാവത് ആരോപിച്ചു. അശുതോഷിനെ എത്രയും പെട്ടെന്ന് പാര്‍ട്ടിയില്‍ നിന്ന് പുറത്താക്കണമെന്ന് അദ്ദേഹം ആവശ്യപ്പെട്ടു. ഗുരുതരമായ തെറ്റുകളെ ന്യായീകരിക്കാന്‍ മഹാത്മാ ഗാന്ധിയെ കൂട്ടുപിടിക്കുന്ന നടപടി അംഗീകരിക്കാനാവില്ലെന്നും അദ്ദേഹം ചൂണ്ടിക്കാട്ടി.
ഇന്ത്യന്‍ നേതാക്കള്‍ അവരുടെ വ്യക്തിപരമായ നിമിഷങ്ങളില്‍ ചെയ്ത കാര്യങ്ങളെപ്പറ്റി ജനങ്ങള്‍ ചിന്തിക്കാറില്ലെന്നും അത് മഹാത്മാഗാന്ധിയുടെ കാലത്ത് തന്നെ അങ്ങനെയാണെന്നുമാണ് അശുതോഷ് പറഞ്ഞത്. മുന്‍ പ്രധാനമന്ത്രി അടല്‍ ബിഹാരി വാജ്‌പേയിയേയും അശുതോഷ് പരാമര്‍ശിച്ചിരുന്നു.
അശ്‌ളീല സിഡി വിവാദത്തില്‍ ഉള്‍പ്പെട്ട മന്ത്രി സന്ദീപ് കുമാറിനെ എ എ പി മന്ത്രിസഭയില്‍ നിന്നും പാര്‍ട്ടിയില്‍ നിന്നും പുറത്താക്കിയിരുന്നു. സിഡിയിലുള്‍പ്പെട്ട യുവതി തന്നെ ബലാത്സംഗം ചെയ്‌തെന്നാരോപിച്ച് സന്ദീപ് കുമാറിനെതിരെ പരാതി നല്‍കി. തുടര്‍ന്ന് പോലീസ് ഇയാളെ അറസ്റ്റ് ചെയ്യുകയും ചെ്തിരുന്നു.
Discussion about this post