ഡല്‍ഹി: കശ്മീരിലെ ഉറി ഭീകരാക്രമണത്തില്‍ പാകിസ്ഥാന് ശക്തമായ മറുപടി നല്‍കുമെന്ന് പ്രധാനമന്ത്രി നരേന്ദ്ര മോദി. ഉറി ഭീകരാക്രമണത്തില്‍ വീരമ്യുത്യൂ വരിച്ച സൈനികര്‍ക്ക് ആദരമര്‍പ്പിച്ച് പ്രതിമാസ റേഡിയോ പരിപാടിയായ മന്‍ കി ബാത്തിലാണ് മോദി ഇക്കാര്യങ്ങള്‍ പറഞ്ഞത്.
ഇന്ത്യന്‍ സൈന്യം സംസാരിക്കുകയല്ല, പ്രത്യാക്രമണം നടത്തുകയാണ് ചെയ്യാറുള്ളത്. ഭാരത സേനയില്‍ പൂര്‍ണ്ണ വിശ്വാസമുണ്ടെന്നും അവരെയോര്‍ത്ത് അഭിമാനിക്കുന്നുവെന്നും മോദി പറഞ്ഞു. സൈന്യം വാക്കുകളിലല്ല പ്രവൃത്തിയിലാണ് വിശ്വസിക്കുന്നതെന്നും മോദി പറഞ്ഞു. കശ്മീരിലെ ജനങ്ങള്‍ സമാധാനം ആഗ്രഹിക്കുന്നവരാണ്. അവിടെ സ്‌കൂളുകളില്‍ കുട്ടികള്‍ക്ക് പഠിക്കാനാകണം. സമാധാനം പുനസ്ഥാപിക്കാനാണ് കരസേന ശ്രമിക്കുന്നതെന്നും മോദി പറയുന്നു.
ഐക്യം, യോജിപ്പ്, സമാധാനം ഇവയാണ് പ്രശ്‌നങ്ങള്‍ പരിഹരിക്കുന്നതിനും വികസനത്തിലേക്കു നീങ്ങുന്നതിനും ആവശ്യമായവയെന്നും മോദി കശ്മീര്‍ ജനതയോട് ആഹ്വാനം ചെയ്തു. കശ്മീര്‍ ജനതയെ സംരക്ഷിക്കുകയെന്നത് അവിടുത്തെ ഭരണകൂടത്തിന്റെ കടമയാണെന്നും മോദി പറഞ്ഞു.
ഉറിയിലേതുപോലെയുള്ള ആക്രമണങ്ങള്‍ ഇനി ഉണ്ടാകില്ലെന്നും ഇത്തരം ആക്രമണങ്ങള്‍ സൈന്യം പരാജയപ്പെടുത്തുമെന്നും പ്രധാനമന്ത്രി വ്യക്തമാക്കി. കശ്മീരിലെ ജനങ്ങളുടെ സുരക്ഷ തന്റെ സര്‍ക്കാരിന്റെ ഉത്തരവാദിത്തമാണെന്നും അദ്ദേഹം കൂട്ടിച്ചേര്‍ത്തു.
പാരാലിമ്പിക് ഒളിമ്പിക്‌സില്‍ മെഡല്‍ നേടിയ താരങ്ങളെ അഭിനന്ദിച്ച പ്രധാനമന്ത്രി തന്റെ സര്‍ക്കാര്‍ നടപ്പിലാക്കിയ സ്വച്ഛ്ഭാരത് അഭിയാന്റെ പുരോഗതിയേക്കുറിച്ചും വിശദീകരിച്ചു. കഴിഞ്ഞ രണ്ടര വര്‍ഷം കൊണ്ട് രണ്ടരക്കോടി ശൗചാലയങ്ങള്‍ പദ്ധതിയുടെ ഭാഗമായി നിര്‍മ്മിച്ചുവെന്നും ഇനി ഒന്നരക്കോടി ശൗചാലയങ്ങള്‍ നിര്‍മ്മിക്കുകയാണ് ലക്ഷ്യമെന്നും അദ്ദേഹം വ്യക്തമാക്കി.
സ്വച്ഛ ഭാരതിന്റെ വളര്‍ച്ച അറിയുന്നതിനായി 1969 എന്ന നമ്പറില്‍ ബന്ധപ്പെട്ടാല്‍ മതിയാകും. ഒക്ടോബര്‍ രണ്ടിന് രാജ്യമൊട്ടാകെയുള്ള ശുചീകരണ പ്രവര്‍ത്തനങ്ങളില്‍ എല്ലാവരും പങ്കാളികളാകണം. രണ്ടോ നാലോ മണിക്കൂറുകള്‍ അതിനായി നീക്കിവയ്ക്കണം. സബ്‌സിഡി തിരികെ നല്‍കാന്‍ ആവശ്യപ്പെട്ടപ്പോള്‍ അതു ചെയതത് ഒട്ടേറെപ്പേരാണ്. അതില്‍ വളരെയധികം സന്തോഷമുണ്ടെന്നും മോദി പറഞ്ഞു.
Discussion about this post