ഡല്‍ഹി: നോട്ട് അസാധുവാക്കിയതിനെ തുടര്‍ന്ന് രാജ്യത്തെ ഓണ്‍ലൈന്‍ ഇടപാടുകള്‍ 1,000 ഇരട്ടിയായി വര്‍ദ്ധിച്ചുവെന്ന് കേന്ദ്രമന്ത്രി രവിശങ്കര്‍ പ്രസാദ്. രാജ്യത്തെ ജനങ്ങളെ ഓണ്‍ലൈന്‍ ഇടപാടുകളെക്കുറിച്ചു ബോതവത്കരിക്കുന്നതിനുളള ചാനലിന്റെയും വെബ്‌സൈറ്റിന്റെയും ഉദ്ഘാടനം നിര്‍വ്വഹിച്ചു സംസാരിക്കുകയായിരുന്നു അദ്ദേഹം.
കറന്‍സി പിന്‍വലിച്ചതിനേത്തുടര്‍ന്ന് ഇതു വരെ ഓണ്‍ലൈന്‍ പേയ്‌മെന്റ് സംവിധാനങ്ങളുടെ ഉപയോഗത്തില്‍ 400 മുതല്‍ 1,000 വരെ ശതമാനത്തിന്റെ വര്‍ദ്ധനയുണ്ടായതായി അദ്ദേഹം ചൂണ്ടിക്കാട്ടി. അതേസമയം വര്‍ദ്ധിച്ച ഇടപാടുകളുടെ കണക്കില്‍ വിസാ, മാസ്റ്റര്‍ കാര്‍ഡുകളുടെ ഉപയോഗം ഉള്‍പ്പെടുത്തിയിട്ടില്ല. ഡിജിറ്റല്‍ ഇടപാടുകളില്‍, നടത്തുന്ന ഇടപാടിന്റെയും, ചിലവഴിക്കുന്ന തുകയുടെയും കൃത്യമായ കണക്ക് മനസ്സിലാക്കാനാകും. സര്‍ക്കാരിനു ലഭിക്കേണ്ട നികുതി കൃത്യമായി ലഭിക്കുന്നതിനാല്‍ രാജ്യത്തിന്റെ സമ്പദ്‌വ്യവസ്ഥയ്ക്കും ഇതു ഗുണം ചെയ്യും. ബാങ്കുകളില്‍ പണമെത്തുന്നത് കൂടുതല്‍ ക്ഷേമപ്രവര്‍ത്തനങ്ങള്‍ നടപ്പിലാക്കുന്നതിന് സര്‍ക്കാരിനെ സഹായിക്കുമെന്നും അദ്ദേഹം കൂട്ടിച്ചേര്‍ത്തു.
ദൂരദര്‍ശന്‍ ഡിടിഎച്ചില്‍ ഇനിമുതല്‍ ഡിജിശാല എന്ന ചാനല്‍ ലഭ്യമായിത്തുടങ്ങും. ഡിജിറ്റല്‍ ഇടപാടുകളെ പ്രോത്സാഹിപ്പിക്കുന്നതിനായി ആരംഭിച്ച ഡിജി ധന്‍ അഭിയാന്‍ കാമ്പയിന്റെ ഭാഗമായാണിത്. ഇന്‍ഫര്‍മേഷന്‍ ടെക്‌നോളജി വകുപ്പാണ് ചാനല്‍ ആരംഭിച്ചിരിക്കുന്നത്.
Discussion about this post