മുംബൈ: നവംബര്‍ എട്ട് മുതല്‍ ഡിസംബര്‍ 31 വരെയുള്ള സിസിടിവി ദൃശ്യങ്ങള്‍ സൂക്ഷിക്കണമെന്ന് ബാങ്കുകള്‍ക്ക് റിസര്‍വ് ബാങ്ക് ഓഫ് ഇന്ത്യയുടെ നിര്‍ദേശം. നോട്ട് അസാധുവാക്കിയതിന് ശേഷം ബാങ്കുകളിലെത്തിയ ഇടപാടുകാരെ തിരിച്ചറിയാനാണ് ആര്‍ബിഐ ഇത്തരമൊരു നിര്‍ദേശം ബാങ്കുകള്‍ക്ക് നല്‍കിയിരിക്കുന്നത്. ഇതോടൊപ്പം ബാങ്കുകള്‍ തങ്ങളുടെ പണം സൂക്ഷിക്കുന്ന കാഷ് ചെസ്റ്ററുകളില്‍ നിന്നുള്ള ദൃശ്യങ്ങളും ശേഖരിച്ചു വയ്ക്കണമെന്നും ആര്‍ബിഐ ബാങ്കുകളോട് ആവശ്യപ്പെട്ടിട്ടുണ്ട്.
നോട്ടുകള്‍ മാറ്റി വാങ്ങുന്നതിനുള്ള സമയപരിധി ഡിസംബര്‍ 31-ഓടെ തീരുന്നതിനാല്‍ കള്ളപ്പണം വെളുപ്പിക്കാന്‍ ശ്രമിച്ചവരെ കണ്ടെത്താനുള്ള ശ്രമങ്ങള്‍ റിസര്‍വ് ബാങ്കും ആദായനികുതി വകുപ്പും ശക്തമാക്കിയിട്ടുണ്ട്. പുതിയ രണ്ടായിരം രൂപയുടെ വന്‍ശേഖരമാണ് കഴിഞ്ഞ ദിവസങ്ങളില്‍ രാജ്യത്തിന്റെ വിവിധ ഭാഗങ്ങളില്‍ നടത്തിയ റെയ്ഡുകളില്‍ ആര്‍ബിഐ പിടിച്ചെടുത്തത്. ബാങ്ക് ജീവനക്കാരിലൂടെ തന്നെ വന്‍തോതില്‍ കള്ളപ്പണം വെളുപ്പിക്കാന്‍ ശ്രമം നടന്നിട്ടുണ്ടെന്നാണ് ആര്‍ബിഐ കരുതുന്നത്. അതുകൊണ്ട് തന്നെ റിസര്‍വ് ബാങ്കില്‍ നിന്നും ബാങ്കുകള്‍ക്ക് ലഭിക്കുന്ന പുതിയ നോട്ടുകള്‍ സംബന്ധച്ച വിവരങ്ങള്‍ കൃത്യമായി സൂക്ഷിക്കണമെന്ന് ബാങ്കുകളോട് ആര്‍ബിഐ ആവശ്യപ്പെട്ടിരിക്കുകയാണ്.
ക്യാഷ് ചെസ്റ്ററുകളില്‍ നിന്ന് ബാങ്ക് ബ്രാഞ്ചുകളിലേക്ക് കൈമാറുന്ന അഞ്ഞൂറ് രൂപ, രണ്ടായിരം രൂപ നോട്ടുകളുടെ സീരിയല്‍ നമ്പര്‍ അടക്കമുള്ള വിവരങ്ങള്‍ എല്ലാ ദിവസവും അറിയിക്കണമെന്നും ആര്‍ബിഐ നിര്‍ദേശിച്ചിട്ടുണ്ട്. ബാങ്കുകളില്‍ നടന്ന എല്ലാ സാമ്പത്തിക ഇടപാടുകളുടേയും രേഖകള്‍ ആദായനികുതി വകുപ്പ് ഇതിനോടകം ശേഖരിച്ചു കഴിഞ്ഞു. ജന്‍ധന്‍ ബാങ്ക് അക്കൗണ്ടുകളിലൂടെ വന്‍തോതില്‍ കള്ളപ്പണം വെളുപ്പിച്ചിട്ടുണ്ടെന്ന് കേന്ദ്രസര്‍ക്കാരിന് ബോധ്യപ്പെട്ടിട്ടുണ്ട്. അതുകൊണ്ട് തന്നെ രണ്ടരലക്ഷത്തിന് താഴെയുള്ള സാമ്പത്തിക ഇടപാടുകളും സൂഷ്മപരിശോധനയ്ക്ക് വിധേയമാക്കാനാണ് സര്‍ക്കാര്‍ ആലോച്ചിക്കുന്നത്.
Discussion about this post