ചെന്നൈ: ചെന്നൈയിലെ പ്രമുഖ വ്യവസായിയും തിരുപ്പതി ദേവസ്ഥാനം അംഗവുമായിരുന്ന ശേഖര്‍ റെഡ്ഡിയെ സിബിഐ അറസ്റ്റ് ചെയ്തു. ശേഖര്‍ റെഡ്ഡിയുടെ കൈയ്യില്‍ നിന്നും ആദായനികുതി വകുപ്പ് 106 കോടി രൂപയും 127 കിലോ സ്വര്‍ണവും പിടിച്ചെടുത്തിരുന്നു.
മുന്‍ തമിഴ്‌നാട് മുഖ്യമന്ത്രി ജയലളിത ആശുപത്രിയില്‍ കിടന്ന സമയത്ത് തിരുമല ക്ഷേത്രത്തില്‍ നിന്നുള്ള പ്രസാദവുമായി ഇയാള്‍ സന്ദര്‍ശനം നടത്തിയത് വിവാദമായിരുന്നു.
കഴിഞ്ഞ കുറച്ചു ദിവസങ്ങളിലായി ചെന്നൈ അടക്കമുള്ള സ്ഥലങ്ങളില്‍ ആദായനികുതി വകുപ്പിന്റെ പരിശോധന നടന്നുവരുന്നതിനിടെയാണ് കണക്കില്‍ പെടാത്ത നോട്ടുകളും സ്വര്‍ണ്ണവും കണ്ടെത്തിയത്. 96.89 കോടിയുടെ പഴയ നോട്ടുകളും 9.63 കോടിയുടെ 2000 രൂപ നോട്ടുകളും 36.29 കോടി വിലമതിക്കുന്ന സ്വര്‍ണ്ണവുമാണ് പിടിച്ചെടുത്തിരിക്കുന്നത്.
മണല്‍ ഖനനം നടത്തുന്ന കമ്പനിയുടെ ഉടമകളായ ശേഖര്‍ റെഡ്ഡി, ശ്രീനിവാസ റെഡ്ഡി ഇവരുടെ ഓഡിറ്റര്‍ പ്രേംകുമാര്‍ എന്നിവരുടെ വീടുകളിലും ഓഫീസുകളിലും അടക്കം എട്ടടങ്ങളിലാണ് പരിശോധന നടത്തിയത്. പണവും സ്വര്‍ണ്ണവും തന്റേതെന്ന് ശേഖര്‍ റെഡ്ഡി മൊഴി നല്‍കി.
Discussion about this post