കോവിഡിന്റെ പുതിയ വേരിയന്റ് യൂറോപ്പ്യന്‍ രാജ്യങ്ങളില്‍ വളരെ പെട്ടെന്ന് പടരുന്നുവെന്ന് റിപ്പോര്‍ട്ട്. എക്സ്ഇസി (XEC) എന്ന കോവിഡ് വകഭേദമാണ് ഇങ്ങനെ പടരുന്നത്. ജൂണില്‍ ജര്‍മ്മനിയിലാണ് പുതിയ വേരിയന്റ് ആദ്യമായി കണ്ടെത്തിയത്. അതിനുശേഷം, യുകെ, യുഎസ്, ഡെന്മാര്ക്ക് തുടങ്ങി നിരവധി രാജ്യങ്ങളില്‍ XEC വേരിയന്റ് അതിവേഗം പടര്‍ന്നു.
നിലവില്‍ യൂറോപ്പില്‍ പ്രബലമായ KS.1.1, KP.3.3 എന്നീ മുന്‍കാല ഒമൈക്രോണ്‍ സബ് വേരിയന്റുകളുടെ ഒരു ഹൈബ്രിഡാണ് XEC വേരിയന്റ്. ഇതുവരെ, പോളണ്ട്, നോര്‍വേ, ലക്‌സംബര്‍ഗ്, ഉക്രെയ്ന്‍, പോര്‍ച്ചുഗല്‍, ചൈന എന്നിവയുള്‍പ്പെടെ 27 രാജ്യങ്ങളില്‍ നിന്നുള്ള 500 സാമ്പിളുകളില്‍ എക്സ്ഇസി കണ്ടെത്തിയതായി റിപ്പോര്‍ട്ട് ചെയ്തിട്ടുണ്ട്.
ഡെന്മാര്ക്ക്, ജര്‍മ്മനി, യുകെ, നെതര്‍ലാന്‍ഡ്‌സ് എന്നിവിടങ്ങളില്‍ വേരിയന്റിന്റെ ശക്തമായ വളര്‍ച്ചയാണ് കാണിക്കുന്നതെന്ന് വിദഗ്ധര്‍ ചൂണ്ടിക്കാട്ടുന്നു. വാക്സിനുകള് കേസുകള്‍ ഗുരുതരമാകുന്നത് തടയാന്‍ സഹായിക്കുമെന്നും വിദഗ്ധര്‍ അഭിപ്രായപ്പെട്ടു.
എക്‌സ്ഇസിക്ക് കൂടുതല്‍ വ്യാപിക്കാനുള്ള ശേഷിയുണ്ട്. വാക്സിനുകളിലാണ് പ്രതീക്ഷ. ശൈത്യകാലത്ത് എക്സ്ഇസി ശക്തമായ സബ് വേരിയന്റായി മാറിയേക്കാം…’ – ലണ്ടനിലെ യൂണിവേഴ്‌സിറ്റി കോളേജിലെ ജനറ്റിക്‌സ് ഇന്‍സ്റ്റിറ്റ്യൂട്ട് ഡയറക്ടര്‍ പ്രൊഫസര്‍ ഫ്രാങ്കോയിസ് ബലൂക്‌സ് ബിബിസിയോട് പറഞ്ഞു.
പനി, തൊണ്ടവേദന, ചുമ, ഗന്ധമില്ലായ്മ, വിശപ്പില്ലായ്മ, ശരീരവേദന എന്നിവയുള്‍പ്പെടെ മുന്‍കാല കൊവിഡ് വേരിയന്റുകളുടേതിന് സമാനമാണ് എക്സ്ഇസി വേരിയന്റിന്റെ ലക്ഷണങ്ങളെന്നും ഗവേഷകര്‍ ചൂണ്ടിക്കാട്ടുന്നു.
വാക്സിനുകള് ആശുപത്രിയില്‍ പ്രവേശിപ്പിക്കപ്പെടുന്നതില്‍ നിന്നും മതിയായ സംരക്ഷണം നല്‍കുമെന്ന് റിപ്പോര്‍ട്ടില്‍ പറയുന്നു.
