റൂർക്കി ; മരിച്ചുവെന്ന് ഡോക്ടർമാർ വിധിയെഴുതിയ 102 കാരി സംസ്കാരത്തിനായി കൊണ്ടുപോകുന്നതിന് നിമിഷങ്ങൾക്ക് മുമ്പ് ജീവിതത്തിലേക്ക് മടങ്ങിയെത്തി. ജ്ഞാന ദേവി എന്ന വൃദ്ധയാണ് അവരുടെ അന്ത്യകർമങ്ങൾക്കായി ഒത്തുകൂടിയ കുടുംബാംഗങ്ങളെയും നാട്ടുകാരെയും ഞെട്ടിച്ചുകൊണ്ട് ജീവിതത്തിലേക്ക് മടങ്ങിവന്നത്.
ഉത്തരാഖണ്ഡ് റൂർക്കി മാംഗ്ലൂരിലെ നർസൻ ഖുർദ് ഗ്രാമത്തിലാണ് സംഭവം. ഏതാനും ആഴ്ചകളായി സുഖമില്ലാതെ കിടക്കുകയായിരുന്ന ജ്ഞാനദേവി. ജനുവരി 31 ന് രാവിലെ ഇവർ ബോധരഹിതയായി വീണു. ഇതോടെ മക്കളം കൊച്ചുമക്കളും ചേർന്ന് ഡോക്ടറെ വിളിച്ചു. ഡോക്ടർമാർ നടത്തിയ പരിശോധനയിൽ ഇവർ മരിച്ചതായി സ്ഥിരീകരിക്കുകയായിരുന്നു. തുടർന്ന് ബന്ധുക്കൾ അന്ത്യകർമങ്ങൾക്കുള്ള ഒരുക്കങ്ങളും ആരംഭിച്ചു.
ഗ്രാമത്തിലെ തന്നെ ഏറ്റവും മുതിർന്നയാളാണ് ജ്ഞാന ദേവി. ഗ്രാമീണരും അകന്ന ബന്ധുക്കളും ഇവരുടെ ശവസംസ്കാരത്തിൽ പങ്കെടുക്കാൻ എത്തി ചേർന്നു. എന്നാൽ ജ്ഞാന ദേവിയുടെ ‘മൃതദേഹം’ ശ്മശാനത്തിലേക്ക് കൊണ്ടുപോകുന്നതിന് മിനിറ്റുകൾക്ക് മുമ്പ്, ബന്ധുക്കളിൽ ഒരാളാണ് ശരീരത്തിൽ ചലനം ശ്രദ്ധിച്ചത്.
മരണത്തിൽ സംശയം തോന്നിയതിനെ തുടർന്ന് ഇവർ ജ്ഞാന ദേവിയുടെ മുഖത്ത് വെള്ളം തളിച്ച് തട്ടിവിളിക്കാൻ തുടങ്ങി. ഒടുവിൽ ഏല്ലാവരെയും ഞെട്ടിച്ചുകൊണ്ട് വൃദ്ധ കണ്ണുകൾ തുറക്കുകയായിരുന്നു. വൈകാതെ ജ്ഞാനദേവി എഴുന്നേറ്റിരുന്ന് ബന്ധുക്കളുമായി സംസാരിക്കാനും തുടങ്ങി.
മരിച്ചെന്ന് ഡോക്ടർമാർ പ്രഖ്യാപിച്ച് 7 മണിക്കൂർ കഴിഞ്ഞാണ് ജ്ഞാനദേവി ജീവിതത്തിലേക്ക് മടങ്ങിവരുന്നത്. തങ്ങൾക്കിത് ഏറ്റവും സന്തോഷമുള്ള സമയമാണെന്നാണ് ജ്ഞാനദേവിയുടെ ബന്ധുക്കൾ പറയുന്നത്.
