ന്യൂഡൽഹി: ധനമന്ത്രി നിർമല സീതാരാമൻ യുഎസിലെത്തി. ഒരാഴ്ചയോളം നീളുന്ന സന്ദർശനത്തിൽ ജി 20 ധനമന്ത്രിമാരുടെയും കേന്ദ്രബാങ്ക് ഗവർണർമാരുടെയും യോഗത്തിൽ അദ്ധ്യക്ഷത വഹിക്കും. ഏപ്രിൽ 16 വരെയാണ് സന്ദർശനം. ന്യൂയോർക്കിലെ ജോൺ എഫ് കെന്നഡി വിമാനത്താവളത്തിലെത്തിയ ധനമന്ത്രിയെ കോൺസുൽ ജനറൽ രന്ത്‌വീർ ജയ്‌സ്വാൾ സ്വീകരിച്ചു.
ലോകബാങ്കിന്റെ ഡെവലപ്മെന്റ് കമ്മിറ്റിയിലും ഐഎംഎഫ് പ്ലീനറി കമ്മിറ്റിയിലും നിർമല സീതാരാമൻ പങ്കെടുക്കും. 12 നും 13 നും നടക്കുന്ന ജി 20 ധനമന്ത്രിമാരുടെയും സെൻട്രൽ ബാങ്ക് ഗവർണർമാരുടെയും യോഗത്തിൽ ആർബിഐ ഗവർണർ ശക്തികാന്ത ദാസിനൊപ്പമാണ് നിർമല സീതാരാമൻ അദ്ധ്യക്ഷത വഹിക്കുക. ഇതിനൊപ്പം അതോടൊപ്പം ആഗോള സാമ്പത്തിക വിദഗ്ധരുമായും വ്യവസായ പ്രമുഖരുമായും നിക്ഷേപകരുമായും ആശയവിനിമയം നടത്തും.
ആഗോള സാമ്പത്തിക രംഗവും അന്താരാഷ്ട്ര സാമ്പത്തിക ചട്ടക്കൂടും, സുസ്ഥിര ധനകാര്യം, സാമ്പത്തിക മേഖലയും സാമ്പത്തിക ഉൾചേർക്കലും തുടങ്ങി മൂന്ന് സെക്ഷനുകളിലായിട്ടാണ് ജി 20 ധനകാര്യമന്ത്രിമാരുടെയും സെൻട്രൽ ബാങ്ക് ഗവർണർമാരുടെയും യോഗം നിശ്ചയിച്ചിരിക്കുന്നത്. ജി 20 രാജ്യങ്ങളിൽ നിന്നുളള 350 ഓളം പ്രതിനിധികളും 13 ക്ഷണിതാക്കളായ രാജ്യങ്ങളും മറ്റ് അന്താരാഷ്ട്ര പ്രാദേശിക സംഘടനകളുടെ പ്രതിനിധികളും ചർച്ചകളിൽ പങ്കെടുക്കും.
ലോകരാജ്യങ്ങൾ നേരിടുന്ന ഭക്ഷ്യ, ഊർജ്ജ അരക്ഷിതാവസ്ഥയെ നേരിടുന്നതുൾപ്പെടെ യോഗങ്ങളിൽ ചർച്ചയാകും. 11 ന് യുഎസ് ട്രഷറി സെക്രട്ടറി ജാനെറ്റ് യെല്ലനുമായും കൂടിക്കാഴ്ച നടത്തും. ധനമന്ത്രാലയത്തിലെ ഉദ്യോഗസ്ഥരും ധനമന്ത്രിയെ അനുഗമിക്കുന്നുണ്ട്.
Discussion about this post