നിയമവിരുദ്ധ പ്രവര്‍ത്തനങ്ങള്‍ക്ക് തടയിടാനുള്ള ഒരുക്കത്തിലാണ് ടെലഗ്രാം.ഇതിനായുള്ള നടപടികള്‍ ഉടന്‍ തന്നെ നടപ്പാക്കുമെന്നാണ് അറിയിച്ചിരിക്കുന്നത്. നിയമവിരുദ്ധ പ്രവര്‍ത്തനങ്ങളുമായി ബന്ധപ്പെട്ട് സംശയിക്കപ്പെടുന്ന ടെലഗ്രാം അക്കൗണ്ടുകളുടെ വിവരങ്ങള്‍ നിയമനിര്‍വഹണ ഏജന്‍സികളുമായി പങ്കുവെക്കുമെന്ന് മേധാവി പാവെല്‍ ദുരോവ് പ്രഖ്യാപിച്ചു ഫോണ്‍ നമ്പര്‍, ഐപി അഡ്രസ് ഉള്‍പ്പടെയുള്ള വിവരങ്ങള്‍ കൈമാറുമെന്നാണ് അറിയിച്ചിരിക്കുന്നത്.
കഴിഞ്ഞ മാസം ഫ്രാന്‍സില്‍ ദുരോവ് അറസ്റ്റ് ചെയ്യപ്പെട്ടതിന് പിന്നാലെയാണ് ഈ നീക്കമെന്നത് ശ്രദ്ധേയമാണ്. പുതിയ മാറ്റങ്ങള്‍ വ്യക്തമാക്കി ടെലഗ്രാമിന്റെ സേവന വ്യവസ്ഥകള്‍ പരിഷ്‌കരിച്ചതായി അദ്ദേഹം അറിയിച്ചു. നിയമവിരുദ്ധമായ വസ്തുക്കളും ഉള്ളടക്കങ്ങളും ടെലഗ്രാമില്‍ തിരയുന്നവരെ പ്ലാറ്റ്‌ഫോമില്‍ ബ്ലോക്ക് ചെയ്യും.
അത്തരം ഉള്ളടക്കങ്ങള്‍ പങ്കുവെക്കാനോ കണ്ടെത്താനോ ശ്രമിക്കുന്നവരുടെ വിവരങ്ങള്‍ നിയമപരമായി ആവശ്യമെങ്കില്‍ അധികൃതര്‍ക്ക് കൈമാറും. സുഹൃത്തുക്കളേയും വാര്‍ത്തകളും തിരയുന്നതാണ് ടെലഗ്രാമിലെ സെര്‍ച്ച് ഫീച്ചറെന്നും നിയമവിരുദ്ധമായ പ്രവര്‍ത്തനങ്ങള്‍ പ്രോത്സാഹിപ്പിക്കുന്നതിനും കണ്ടെത്തുന്നതിനും വേണ്ടിയല്ലെന്നും ദുരോവ് ഊന്നിപ്പറഞ്ഞു.
നിയമവിരുദ്ധ ഉള്ളടക്കങ്ങള്‍, മയക്കുമരുന്നുകള്‍, തട്ടിപ്പുകള്‍, കുട്ടികളെ ചൂഷണം ചെയ്യുന്ന ചിത്രങ്ങള്‍ എന്നിവ ടെലഗ്രാം സെര്‍ച്ചില്‍ വരാതിരിക്കാന്‍ എഐ സാങ്കേതിക വിദ്യയും ടെലഗ്രാം ഉപയോഗപ്പെടുത്തും. ടെലഗ്രാമിന്റെ സാധാരണ ഉപഭോക്താക്കളെ ഈ നടപടികള്‍ യാതൊരുതരത്തിലും ബാധിക്കുകയില്ല. വാട്‌സാപ്പ് പോലുള്ള പ്ലാറ്റ്‌ഫോമുകളില്‍ നേരത്തെ തന്നെ ഈ നയം പിന്തുടരുന്നുണ്ട്.
Discussion about this post