മുംബൈ: എയർ ഇന്ത്യ വിമാനത്തിൽ മോശമായി പെരുമാറിയ ഇന്ത്യൻ വംശജനായ അമേരിക്കൻ പൗരനെതിരെ കേസ്. 37 കാരനായ രാമകാന്തിനെതിരെയാണ് മുംബൈ പോലീസ് കേസ് എടുത്തത്. വിമാനത്തിൽവച്ച് ഇയാൾ പുകവലിക്കുകയും ഇത് ചോദ്യം ചെയ്ത സഹയാത്രികരോടും കാബിൻ ക്രൂ അംഗങ്ങളോടും മോശമായി പെരുമാറുകയുമായിരുന്നു.
മുംബൈയിൽ നിന്നും ലണ്ടനിലേക്കുള്ള എയർ ഇന്ത്യ വിമാനത്തിലായിരുന്നു സംഭവം. വിമാനം പുറപ്പെട്ടതിന് പിന്നാലെ ഇയാൾ ശുചിമുറിയിൽ എത്തി പുക വലിക്കുകയായിരുന്നു. വിമാനത്തിൽ പുക വലിക്കുന്നതിന് വിലക്കുണ്ട്. ഇത് അവഗണിച്ചായിരുന്നു രാമകാന്തിന്റെ പ്രവർത്തി. സംഭവം ശ്രദ്ധയിൽപ്പെട്ട മറ്റ് യാത്രികർ ഇത് ചോദ്യം ചെയ്തു. എന്നാൽ അവരോട് രാമകാന്ത് കയർത്ത് സംസാരിക്കുകയായിരുന്നു. ഇതോടെ വിവരം യാത്രികർ കാബിൻ ക്രൂ ജീവനക്കാരോട് പറഞ്ഞു. പുകവലിക്കരുതെന്ന് താക്കീത് നൽകിയ കാബിൻ ക്രൂ അംഗങ്ങളോടും ഇയാൾ മോശമായി പെരുമാറി. തുടർന്ന് ജീവനക്കാർ ഇയാളെ അനുനയിപ്പിച്ച് സീറ്റിൽ ഇരുത്തി. എന്നാൽ ഇവിടെ ഇരിക്കാൻ കൂട്ടാക്കാതിരുന്ന ഇയാൾ വിമാനത്തിന്റെ വാതിൽ തുറക്കാൻ ശ്രമിക്കുകയായിരുന്നു. ഇതോടെ മറ്റ് യാത്രികർ പരിഭ്രാന്തരായി. പിന്നീട് യാത്രികരിൽ ഒരാളായ ഡോക്ടർ ഇയാളെ അനുനയിപ്പിച്ച് സീറ്റിൽ ഇരുത്തുകയായിരുന്നു.
മുംബൈയിൽ വിമാനം ഇറങ്ങിയതിന് തൊട്ടുപിന്നാലെ ജീവനക്കാർ പോലീസിൽ പരാതി നൽകി. സംഭവത്തിൽ ഇന്ത്യൻ ശിക്ഷാ നിയമത്തിലെ 336ാം വകുപ്പ് പ്രകാരമാണ് പോലീസ് കേസ് എടുത്തത്. ഇതിന് പുറമേ 1937 ലെ എയർക്രാഫ്റ്റ് നിയമത്തിലെ വിവിധ വകുപ്പുകളും രാമകാന്തിനെതിരെ ചുമത്തിയിട്ടുണ്ട്. ഇയാളുടെ അറസ്റ്റ് ഉൾപ്പെടെയുള്ള നടപടികളിലേക്ക് പോലീസ് ഉടൻ കടക്കുമെന്നാണ് വിവരം. നിലവിൽ ഇയാൾ സഹർ പോലീസിന്റെ കസ്റ്റഡിയിലാണ്.
Discussion about this post