ന്യൂഡല്ഹി: കുടുംബം പോറ്റാനായി സമൂസയും മറ്റ് പലഹാരങ്ങളും വില്ക്കുന്ന യുപി നോയിഡയില് നിന്നുള്ള 18 വയസുകാരന്റെ വിജയഗാഥ ശ്രദ്ധ നേടുകയാണ്. ജീവിതത്തിലെ എല്ലാ പ്രതിബന്ധങ്ങളെയും കഠിനാധ്വാനം കൊണ്ട് മറികടന്ന 18കാരന് സണ്ണി കുമാര് നീറ്റ് യുജി 2024 പരീക്ഷയില് 720ല് 664 മാര്ക്ക് നേടിയാണ് മറ്റു വിദ്യാര്ഥികള്ക്ക് പ്രചോദനമായത്.
ഡോക്ടര് ആകണമെന്ന അതിയായ ആഗ്രഹത്തോടൊപ്പം കുടുംബം പോറ്റാന് രാപ്പകലില്ലാതെ കഠിനാധ്വാനം ചെയ്ത ഈ ചെറുപ്പക്കാരനാണ് ഇപ്പോള് സോഷ്യല്മീഡിയയിലെ റിയല് ഹീറോ.
ഫിസിക്സ് വാല സിഇഒ അലക് പാണ്ഡെയാണ് തന്റെ ഇന്സ്റ്റഗ്രാമില് 18കാരന്റെ വിജയകഥ പങ്കുവെച്ചത്. രാവിലെ സ്കൂളില് പോയി തിരിച്ചെത്തിയ ശേഷം നോയിഡ സെക്ടര് 12ല് ഉന്തുവണ്ടിയില് വൈകുന്നേരം 4 മുതല് രാത്രി 9 വരെ സമൂസയും മറ്റു ഭക്ഷ്യവസ്തുക്കളും വിറ്റാണ് ഉപജീവനം നടത്തിയിരുന്നത്. പിതാവില് നിന്ന് സാമ്പത്തിക സഹായം കിട്ടാതെ വന്നതോടെ സണ്ണി കുടുംബഭാരം ഏറ്റെടുക്കുകയായിരുന്നു.
നന്നായി പഠിക്കാനും ജീവിതത്തില് എന്തെങ്കിലും ആകാനും അമ്മയില് നിന്ന് തനിക്ക് പൂര്ണ്ണ പിന്തുണ ലഭിച്ചതായി വീഡിയോകളില് സണ്ണി പങ്കുവെച്ചു. ഡോക്ടറാകുക എന്ന തന്റെ സ്വപ്നവുമായി സണ്ണി ഇനി നേരെ പോവുക സര്ക്കാര് മെഡിക്കല് കോളജിലേക്കാണ്. സണ്ണിയുടെ മുന്നോട്ടുള്ള ജീവിത സമരത്തിലും ആശംസകളുമായി നിരവധി പേരാണ് രംഗത്തുവന്നിരിക്കുന്നത്.
Discussion about this post