കര്ണാടക മുന് മുഖ്യമന്ത്രിമാരായ സിദ്ധരാമയ്യക്കും എച്ച്.ഡി.കുമാരസ്വാമിക്കുമെതിരെ ബെംഗളൂരു പോലീസ് രാജ്യദ്രോഹ കുറ്റം ചുമത്തി കേസെടുത്തു. ലോക്സഭാ തെരഞ്ഞെടുപ്പ് വേളയില് ആദായ നികുതി വകുപ്പ് നടത്തിയ റെയ്ഡിനെതിരെ സംഘടിപ്പിച്ച പ്രതിഷേധവുമായി ബന്ധപ്പെട്ടാണ് കേസ്.
രാജ്യദ്രോഹം, ക്രിമിനല് ഗൂഢാലോചന, രാജ്യത്തിനെതിരെ യുദ്ധത്തിന് ശ്രമിച്ചു തുടങ്ങിയ കുറ്റങ്ങളാണ് ചുമത്തിയത്.അപകീര്ത്തിപ്പെടുത്തിയെന്ന കുറ്റവും ഇരുവര്ക്കുമെതിരെ ചുമത്തിയിട്ടുണ്ട്. കോടതി നിര്ദേശ പ്രകാരമാണ് എഫ്.ഐ.ആര് രജിസ്റ്റര് ചെയ്തത്.
മുന് ഉപമുഖ്യമന്ത്രി ജി.പരമേശ്വര, പിസിസി അധ്യക്ഷന് ദിനേശ് ഗുണ്ടുറാവു, മുന് മന്ത്രി ഡി.കെ ശിവകുമാര് തുടങ്ങി 23 രാഷ്ട്രീയ പാര്ട്ടി നേതാക്കള്ക്കും മുന് ബെംഗളൂരു പോലീസ് കമ്മീഷണര് ടി.സുനീല്കുമാറടക്കം ഒമ്പത് പോലീസ് ഉദ്യോഗസ്ഥര്ക്കുമെതിരെ ഇതേ പരാതിയില് കേസെടുത്തിട്ടുണ്ട്.
ബെംഗളൂരുവിലെ ആദായ നികുതി വകുപ്പ് ഓഫീസിന് മുന്നിലായിരുന്നു പ്രതിഷേധം നടത്തിയത്. ആദായ നികുതി വകുപ്പ് ബിജെപിയുടെ ഏജന്റാണെന്ന തെറ്റായ ആരോപണം ഉന്നയിച്ചു. ഉദ്യോഗസ്ഥരുടെ ഔദ്യോഗിക കൃത്യനിര്വഹണത്തിന് തടസ്സം സൃഷ്ടിച്ചു തുടങ്ങിയ കാര്യങ്ങളാണ് പരാതിയില് ഉന്നയിച്ചിരിക്കുന്നത്.
Discussion about this post