കൊച്ചി: പ്രായപൂര്ത്തിയാകാത്ത പെണ്കുട്ടിയെ ഉപയോഗിച്ച് വ്യാജവാര്ത്ത ചമച്ച കേസില് ഏഷ്യാനെറ്റ് ന്യൂസ് മാദ്ധ്യമപ്രവര്ത്തകര്ക്കെതിരെ കുറ്റപത്രം സമര്പ്പിച്ച് പോലീസ്.
ഏഷ്യാനെറ്റ് ന്യൂസ് എക്സിക്യൂട്ടീവ് എഡിറ്റര് സിന്ധു സൂര്യകുമാര്, റസിഡന്റ് എഡിറ്റര് കെ ഷാജഹാന്, റിപ്പോര്ട്ടര് നൗഫല് ബിന് യൂസഫ്, ഏഷ്യാനെറ്റ് ജീവനക്കാരിയായ പെണ്കുട്ടിയുടെ അമ്മ, വീഡിയോ എഡിറ്റര് വിനീത് ജോസ്, കാമറാമാന് വിപിന് മുരളീധരന് എന്നിവരെ പ്രതി ചേര്ത്താണ് കുറ്റപത്രം.
ക്രൈംബ്രാഞ്ച് അസി. കമീഷണര് വി സുരേഷിന്റെ നേതൃത്വത്തിലുള്ള അന്വേഷണ സംഘമാണ് കോഴിക്കോട് അഡീഷണല് ഡിസ്ട്രിക്ട് ആന്ഡ് സെഷന്സ് കോടതി (പോക്സോ പ്രത്യേക കോടതി)യില് കുറ്റപത്രം സമര്പ്പിച്ചത്. ക്രിമിനല് ഗൂഢാലോചന, വ്യാജരേഖ ചമയ്ക്കല്, വ്യാജ ഇലക്ട്രോണിക് രേഖ ചമയ്ക്കല്, തെളിവ് നശിപ്പിക്കല് ഉള്പ്പെടെയുള്ള വകുപ്പുകള് ചേര്ത്താണ് കേസ്. പോക്സോ നിയമപ്രകാരവും കേസുണ്ട്.
