ബംഗളൂരു : ബിജെപി വിടുമെന്നുള്ള വാർത്തകൾ തള്ളി കർണാടക മുൻമുഖ്യമന്ത്രി സദാനന്ദ ഗൗഡ. ഇനി തിരഞ്ഞെടുപ്പിൽ മത്സരിക്കാൻ ഇല്ലെന്നും ബിജെപിയിൽ തന്നെ തുടരുമെന്നും സദാനന്ദ ഗൗഡ വ്യക്തമാക്കി. കോൺഗ്രസിൽ നിന്നും പല വാഗ്ദാനങ്ങളും ഉണ്ടായെന്നും എന്നാൽ തന്നെ വിലയ്ക്ക് എടുക്കാൻ കഴിയില്ല എന്നും സദാനന്ദ ഗൗഡ അഭിപ്രായപ്പെട്ടു.
ലോക്സഭാ തിരഞ്ഞെടുപ്പിന് താൻ മത്സരരംഗത്ത് ഇല്ലാതിരുന്നതിനെത്തുടർന്നാണ് വിവാദങ്ങൾ ഉണ്ടായത്. താൻ സിറ്റിംഗ് എംപി ആയിരിക്കുന്ന ബംഗളൂരു നോർത്ത് മണ്ഡലത്തിൽ തനിക്ക് പകരമായി ശോഭ കരന്തലജെ സ്ഥാനാർത്ഥിയായപ്പോൾ ആണ് തെറ്റിദ്ധാരണകൾ ഉണ്ടായതെന്ന് സദാനന്ദ ഗൗഡ അഭിപ്രായപ്പെട്ടു.
കോൺഗ്രസിൽ നിന്നും തനിക്ക് പല വാഗ്ദാനങ്ങളും ഉണ്ടായിരുന്നു. സീറ്റ് നൽകാമെന്നും കോൺഗ്രസ് സൂചിപ്പിച്ചു. എന്നാൽ താൻ ബിജെപി വിട്ട് പോകുന്നില്ല എന്നാണ് തീരുമാനം. എന്നാൽ തിരഞ്ഞെടുപ്പിൽ ഇനി മത്സരിക്കുന്നില്ല. കർണാടകയിലെ ബിജെപിയിൽ ചില ആസ്വാരസ്യങ്ങൾ ഉണ്ടെന്നുള്ളത് സത്യമാണ്. അതെല്ലാം മാറ്റി പാർട്ടിയെ ശുദ്ധീകരിക്കേണ്ടതാണ്. അതിനായി താൻ ബിജെപിയിൽ തന്നെ ഉണ്ടാകും എന്നും സദാനന്ദ ഗൗഡ വ്യക്തമാക്കി.
Discussion about this post