ചെന്നൈ : സംഗീതസംവിധായകൻ ഇളയരാജയുടെ ജീവിത കഥ സിനിമയാകുന്നു. ചിത്രത്തിന് തിരക്കഥ ഒരുക്കുന്നത് കമൽഹാസൻ ആണ്. ഇളയരാജ എന്ന പേരിട്ടിരിക്കുന്ന ചിത്രത്തിൽ ധനുഷ് ആണ് നായകനാകുന്നത്. ധനുഷിന്റെ ക്യാപ്റ്റൻ മില്ലർ എന്ന ചിത്രത്തിലൂടെ ശ്രദ്ധേയനായ അരുൺ മാതേശ്വരൻ ആണ് ഇളയരാജ സംവിധാനം ചെയ്യുന്നത്.
ചെന്നൈയിൽ നടന്ന താരസമ്പന്നമായ ചടങ്ങിൽ വച്ച് ചിത്രത്തിന്റെ ടൈറ്റിലും ഫസ്റ്റ്ലുക്ക് പോസ്റ്ററും ലോഞ്ച് ചെയ്തു. അടുത്തവർഷം മുതലായിരിക്കും ചിത്രത്തിന്റെ ഷൂട്ടിംഗ് ആരംഭിക്കുന്നത്. ഇളയരാജ തന്നെയാണ് ചിത്രത്തിനായി സംഗീതവും പശ്ചാത്തല സംഗീതവും ഒരുക്കുന്നത്. വിശ്വരൂപം, വിരുമാണ്ടി, അൻപേ ശിവം, പഞ്ചതന്ത്രം, ഹേ റാം എന്നീ ചിത്രങ്ങൾക്ക് ശേഷമാണ് കമൽഹാസൻ വീണ്ടും തിരക്കഥാകൃത്തിന്റെ റോളിലേക്ക് വരുന്നത്.
ചെന്നൈയിലെ ലീല പാലസ് ഹോട്ടലിൽ വച്ചാണ് ഇളയരാജയുടെ ലോഞ്ചിങ് ചടങ്ങ് നടന്നത്. ഇളയരാജയോടൊപ്പം ധനുഷ്, കമൽഹാസൻ, ഭാരതിരാജ, അരുൺ മാതേശ്വരൻ, വെട്രിമാരൻ, ഗംഗൈ അമരൻ എന്നിവരും ചടങ്ങിൽ പങ്കെടുത്തു. കണക്റ്റികട്ട് മീഡിയ, പി കെ പ്രൈം പ്രൊഡക്ഷൻസ്, മെർക്കുറി മൂവീസ് എന്നിവർ ചേർന്ന് സംയുക്തമായാണ് ചിത്രം നിർമ്മിക്കുന്നത്. തമിഴ്, തെലുങ്ക്, ഹിന്ദി, മലയാളം,കന്നട ഭാഷകളിലായി ചിത്രം റിലീസ് ചെയ്യുന്നതാണ്.
Discussion about this post