തിരുവനന്തപുരം: ജിഷ്ണു പ്രണോയിയുടെ അമ്മ മഹിജയ്ക്കും സഹോദരനുമെതിരെയുള്ള പോലീസ് അതിക്രമത്തിന്റെ അന്വേഷണ റിപ്പോര്‍ട്ട് ഐ.ജി മനോജ് എബ്രഹാം ഡി.ജി.പിക്ക് സമര്‍പ്പിച്ചു. പോലീസ് ആസ്ഥാനത്ത് നടന്ന സംഭവങ്ങള്‍ വിശദീകരിക്കുന്ന വസ്തുതാ വിവര റിപ്പോര്‍ട്ടാണ് സമര്‍പ്പിച്ചിരിക്കുന്നത്.
മഹിജയ്ക്ക് മര്‍ദനമേറ്റതായി തെളിവില്ലെന്നും എന്നാല്‍ ക്ഷതമേറ്റിട്ടുണ്ടെന്നും റിപ്പോര്‍ട്ടില്‍ ചൂണ്ടിക്കാണിക്കുന്നുണ്ട്. കൂടാതെ ഇതുമായി ബന്ധപ്പെട്ട് ഏതെങ്കിലും പോലീസുകാര്‍ക്കെതിരെ നടപടിയെടുക്കണമെന്നും റിപ്പോര്‍ട്ടില്‍ പരാമര്‍ശമില്ല. കൂടാതെ സമരക്കാരോടൊപ്പമെത്തിയ ഷാജഹാന്‍ അടക്കമുള്ളവര്‍ക്ക് ഗൂഡാലോചനയുണ്ടായിരുന്നതായും പറയുന്നുണ്ട്.
കഴിഞ്ഞ ബുധനാഴ്ചയായിരുന്നു ഡി.ജി.പി ആസ്ഥാനത്തെത്തിയ അമ്മ മഹിജ, അമ്മാവന്‍ ശ്രീജിത്ത് എന്നിവര്‍ക്കെതിരെയും സമരം ചെയ്യാനെത്തിയ മറ്റുള്ളവര്‍ക്കെതിരെയും പോലീസ് ബലപ്രയോഗം നടത്തിയത്. സംഭവത്തില്‍ മഹിജയക്കും ശ്രീജിത്തിനും പരിക്കേല്‍ക്കുകയും ചെയ്തിരുന്നു. അക്രമം അഴിച്ച് വിട്ട പോലീസുകാര്‍ക്കെതിരെ നടപടിയെടുക്കണം എന്ന് കൂടി ആവശ്യപ്പെട്ട് അന്ന് മുതല്‍ മഹിജയും ശ്രീജിത്തും നിരാഹാര സമരത്തിലുമാണ്. ഇതുമായി ബന്ധപ്പെട്ടാണ് ഐ.ജി മനോജ് എബ്രഹാം ഇന്ന് റിപ്പോര്‍ട്ട് സമര്‍പ്പിച്ചത്. ഇപ്പോള്‍ സംസ്ഥാനത്തിന് പുറത്തുള്ള ഡി.ജി.പി സ്ഥലത്തെത്തിയ ശേഷം മാത്രമേ റിപ്പോര്‍ട്ടിന്‍മേലുള്ള സര്‍ക്കാര്‍ തീരുമാനം ഉണ്ടാവുകയുള്ളൂ.
എന്നാല്‍ റിപ്പോര്‍ട്ട് തയ്യാറാക്കിയത് മഹിജയോട് കൂടി ചോദിച്ചാണെന്ന് നിയമമന്ത്രി എ.കെ ബാലന്‍ കോഴിക്കോട് പറഞ്ഞു. അതേസമയം, മുഖ്യമന്ത്രിയുടെ തിരക്കഥയ്ക്കനുസരിച്ചാണ് ഐജി റിപ്പോര്‍ട്ട് തയ്യാറാക്കിയതെന്ന് പ്രതിപക്ഷ നേതാവ് രമേശ് ചെന്നിത്തല ആരോപിച്ചു. റിപ്പോര്‍ട്ട് നല്‍കുന്നതിനു മുന്‍പ് ഐജി, എം.വി ജയരാജനെ കണ്ടിരുന്നതായും ചെന്നിത്തല ആരോപിച്ചു.
Discussion about this post