തിരുവനന്തപുരം: ടോമിന്‍ ജെ.തച്ചങ്കരി കേരള ബുക്‌സ് ആന്‍ഡ് പബ്ലിഷിങ് സൊസൈറ്റി മാനേജിങ് ഡയറക്ടര്‍ സ്ഥാനത്തുനിന്നു തെറിച്ചതു മുഖ്യമന്ത്രി പിണറായി വിജയന്റെ പ്രൈവറ്റ് സെക്രട്ടറി എം.വി. ജയരാജന്റെ അന്വേഷണത്തില്‍. കെബിപിഎസിലെ സിഐടിയു യൂണിയന്‍ നേതാക്കള്‍ ഉള്‍പ്പെടെ തച്ചങ്കരിയുടെ ഇടപാടുകളെക്കുറിച്ചു മുഖ്യമന്ത്രിയെ അറിയിച്ചെങ്കിലും ആദ്യം അദ്ദേഹമതത്ര കാര്യമാക്കിയില്ല.
എന്നാല്‍, അച്ചടിവകുപ്പിന്റെ ചുമതലക്കാരനായ തനിക്കു തന്നെ ഇതു കുരുക്കാകുമെന്ന സൂചന കിട്ടിയപ്പോള്‍ മുഖ്യമന്ത്രി പ്രിന്‍സിപ്പല്‍ സെക്രട്ടറി നളിനി നെറ്റോയെ അന്വേഷണം ഏല്‍പിച്ചു.അവര്‍ പ്രസ് സന്ദര്‍ശിച്ചശേഷം കുഴപ്പങ്ങളുണ്ടെന്നു ധരിപ്പിച്ചു. ഇതില്‍ തൃപ്തി വരാതെയാണു ജയരാജനെ അയച്ചത്. സിപിഎം കളമശേരി ഏരിയാ സെക്രട്ടറിയും കെബിപിഎസിലെ സിഐടിയു യൂണിയന്‍ പ്രസിഡന്റുമായ സക്കീര്‍ ഹുസൈന്‍ പോലും ജയരാജന്റെ കെബിപിഎസ് സന്ദര്‍ശനം അറിഞ്ഞില്ല. പാഠപുസ്തകങ്ങള്‍ അച്ചടിച്ചതു നിലവാരമില്ലാത്ത കടലാസിലാണെന്നു പരാതിയുണ്ടെന്നു ജയരാജന്‍ ജീവനക്കാരെ അറിയിച്ചു. അച്ചടിയന്ത്രങ്ങള്‍ വാങ്ങിയതിനെക്കുറിച്ചും ലോട്ടറി അച്ചടിയിലെ ക്രമക്കേടുകളെക്കുറിച്ചും അദ്ദേഹം ചോദിച്ചറിഞ്ഞു.
ലോട്ടറിയില്‍ നമ്പര്‍ രേഖപ്പെടുത്താന്‍ എട്ടരക്കോടിയുടെ മെഷീനാണു വാങ്ങിയത്. ഗുണമേന്മയില്ലന്നു പറഞ്ഞു മണിപ്പാലിലെ ഒരു പ്രസ് മടക്കിവിട്ട മെഷീനാണിത്. നമ്പര്‍ ഇടുന്ന ജോലിക്കു മെഷീന്‍ നിര്‍മാണക്കമ്പനിക്കു തുക നല്‍കുന്ന വിചിത്രമായ കരാറും ഉണ്ടാക്കി. ഒരു ടിക്കറ്റിന് മൂന്നു പൈസയാണു നിരക്ക്. ദിവസം 94 ലക്ഷം ടിക്കറ്റ് അച്ചടിക്കുന്നുണ്ട്. എന്നാല്‍, അച്ചടിയും നമ്പറിടലും ഉള്‍പ്പെടെ ജോലികള്‍ ചെയ്യുന്ന മറ്റൊരു കരാറുകാരന് ഇവിടെ പ്രവര്‍ത്തിക്കുന്നു. പേപ്പര്‍ മാത്രം കെബിപിഎസ് നല്‍കും. ഒരു ടിക്കറ്റിന് നാലു പൈസ ഈ കരാറുകാരനു നല്‍കുന്നു. നമ്പറിങ് മെഷീന്‍ വാങ്ങിയ കമ്പനിക്കുള്ള തുക അതതു ദിവസം നല്‍കുമ്പോള്‍, നാലു പൈസയ്ക്കു നമ്പറിട്ടു ലോട്ടറി അച്ചടിച്ചു നല്‍കുന്ന കരാറുകാരന് 1.32 കോടി രൂപ കുടിശികയാണ്.
ചൈനീസ് കമ്പനിയുടേതുള്‍പ്പെടെ 18 കോടിയുടെ അച്ചടിയന്ത്രങ്ങള്‍ ഈയിടെ കെബിപിഎസില്‍ വാങ്ങിയിരുന്നു. ഇതിനു സര്‍ക്കാരിന്റെ അനുമതി തേടിയില്ല. ജര്‍മനിയില്‍ നടന്ന അച്ചടി പ്രദര്‍ശനമായ ലേബല്‍ എക്‌സ്‌പോയില്‍ പങ്കെടുത്ത തച്ചങ്കരി ഒരു കമ്പനിയില്‍നിന്ന് അച്ചടിയന്ത്രം വാങ്ങാന്‍ തീരുമാനിച്ചു. ഇതറിഞ്ഞ ചില സിഐടിയു നേതാക്കളാണു മുഖ്യമന്ത്രിക്കു മുന്നറിയിപ്പ് നല്‍കിയത്. തച്ചങ്കരിയുടെ ഇടപാടുകളെക്കുറിച്ച് അന്വേഷിക്കാന്‍ വിജിലന്‍സിനോട് ആവശ്യപ്പെട്ടിട്ടുണ്ട്. അഗ്‌നിശമന സേനാ ഡയറക്ടറാണു തച്ചങ്കരി ഇപ്പോള്‍.
Discussion about this post