1984ല്‍ ഐതിഹാസികമായ രീതിയില്‍ കോണ്‍ഗ്രസ് ഇന്ത്യയില്‍ വിജയിച്ചത് ആര്‍.എസ്.എസിന്റെ പിന്തുണയുണ്ടായിരുന്നത് കൊണ്ടെന്ന് തന്റെ പുസ്തകത്തില്‍ പറയുകയാണ് എഴുത്തുകാരനും മാധ്യമപ്രവര്‍ത്തകനുമായ റഷീദ് കിദ്വായ്. ’24 അക്ബര്‍ റോഡ്: എ ഷോര്‍ട്ട് ഹിസ്റ്ററി ഓഫ് ദ പീപ്പിള്‍ ബിഹൈന്‍ഡ് ദ ഫോള്‍ ആന്‍ഡ് റൈസ് ഓഫ് ദ കോണ്‍ഗ്രസ്’ എന്ന പുസ്തകത്തിലാണ് ഈ വെളിപ്പെടുത്തലുള്ളത്‌. പിന്തുണ ലഭിക്കാന്‍ രാജീവ് ഗാന്ധി ആര്‍.എസ്.എസിന്റെ ഉന്നത നേതാക്കളുമായി ചര്‍ച്ച നടത്തിയെന്നും പുസ്തകത്തില്‍ പറയുന്നു. ഇതിന്റെ ഫലമായാണ് 523 അംഗമുള്ള സഭയില്‍ കോണ്‍ഗ്രസിന് 415 സീറ്റുകള്‍ നേടാന്‍ കഴിഞ്ഞതെന്നാണ് റഷീദ് വാദിക്കുന്നത്.
പുസ്തകത്തിലെ മൂന്നാം അധ്യായമായ ദ ബിഗ് ട്രീ ആന്‍ഡ് സാപ്ലിങിലാണ് ഈ പരാമര്‍ശമുള്ളത്. ഇന്ദിരാ ഗാന്ധിയുടെ മരണം മൂലം രാജീവ് ഗാന്ധിക്ക് സഹതാപ തരംഗം ലഭിച്ചെങ്കിലും ആര്‍.എസ്.എസ് സര്‍സംഘചാലക് ദേവറസുമായി രഹസ്യമായി കൂടിക്കാഴ്ച നടത്തിയെന്നും ഇതിന് മധ്യസ്ഥത വഹിച്ചത് ബന്‍വരിലാല്‍ പുരോഹിത്ത് എന്ന കോണ്‍ഗ്രസ് നേതാവാണെന്നും പുസ്തകത്തില്‍ പറയുന്നു. രാമജന്മഭൂമിയില്‍ ശിലാസ്ഥാപനം നടത്തിയാല്‍ കോണ്‍ഗ്രസിനെ പിന്തുണയ്ക്കുമൊ എന്നായിരുന്നു രാജീവ് മുന്നോട്ട് വെച്ച ആശയമെന്ന് ബന്‍വരിലാല്‍ പുരോഹിത്ത് തന്നെ പുസ്തകത്തിലൂടെ അറിയിക്കുന്നുണ്ട്. എന്നാല്‍ ഈ പരാമര്‍ശത്തെ ബി.ജെ.പി നിഷേധിക്കുകയാണുണ്ടായത്.
Discussion about this post