പാലക്കാട്: കേരളത്തിലെ മാവോയിസ്റ്റ് പ്രവര്‍ത്തനങ്ങള്‍ക്ക് നേതൃത്വം നല്‍കുന്നത് മലപ്പുറം സ്വദേശി സി.പി.മൊയ്തീന്‍ എന്ന് പോലിസിന് സൂചന.മാവോയിസ്റ്റുകള്‍ക്കിടയില്‍ ഇയാള്‍ സഖാവെന്നാണ് വിളിക്കപ്പെട്ടതെന്നും പോലിസ് വ്യക്തമാക്കിയിട്ടുണ്ട്.മലപ്പുറം പാണ്ടിക്കാടാണ് ഇയാളുടെ സ്വദേശമെന്ന് പോലിസിന് വിവരം ലഭിച്ചിട്ടുണ്ട്.
ഇയാള്‍ ഉടന്‍ വലയിലാവുമെന്നാണ് പൊലീസ് വൃത്തങ്ങള്‍ നല്‍കുന്ന റിപ്പോര്‍ട്ട്.കേരളത്തില്‍ നടന്ന നഗരകേന്ദ്രിതമായ ആക്രമണങ്ങളുടെയെല്ലാം ആസൂത്രകന്‍ മൊയ്തീന്‍ ആണെന്നാണ് പൊലീസ് പറയുന്നത്.
ഇയാള്‍ എവിടെയുണ്ട് എന്നതിനെ കുറിച്ച് പൊലീസിന് ഏകദേശ ധാരണ ലഭിച്ചിട്ടുണ്ട്. കേരള കര്‍ണാടക അതിര്‍ത്തി കേന്ദ്രീകരിച്ചാണ് ഇയാള്‍ പ്രവര്‍ത്തനം തുടരുന്നത് എന്നാണ് വിവരം.
ഇയാളുടെ വലത് കൈപ്പത്തി ഈയിടെ ഉണ്ടായ ആക്രമണത്തിനിടെ നഷ്ടപ്പെട്ടതാണെന്ന് പൊലീസ് വൃത്തങ്ങള്‍ വ്യക്തമാക്കി. പാലക്കാട് റസ്റ്റോറന്റ്, നിറ്റ ജലാറ്റിന്‍ ആക്രമണങ്ങള്‍ക്കു ശേഷം ഇയാള്‍ ഒളിവിലാണെന്നും പൊലീസ് പറയുന്നു. ഇയാളുടെ ചിത്രമടക്കം പൊലീസിന് ലഭിച്ചിട്ടുണ്ടെന്നാണ് സൂചന. അറസ്റ്റിലായ രൂപേഷില്‍നിന്നല്ല ഇയാളെ കുറിച്ച് വിവരം ലഭിച്ചതെന്നാണ് സൂചന. നേരത്തെ, നിറ്റ ജലാറ്റിന്‍ ആക്രമണ കേസില്‍ അറസ്റ്റിലായവരില്‍നിന്നാണ് ആദ്യം സഖാവ് എന്ന് വിളിക്കപ്പെടുന്ന ഒരാളെ കുറിച്ച് സൂചന ലഭിച്ചത്. കണ്ണൂര്‍ സ്വദേശിയായ ഒരാളാണ് ഇതെന്നായിരുന്നു നേരത്തെപൊലീസിന്റെ അനുമാനം. എന്നാല്‍, ഇപ്പോള്‍ ഇയാളെ കുറിച്ച് കൂടുതല്‍ വിവരങ്ങള്‍ ലഭിച്ചിട്ടുണ്ട്.
Discussion about this post