മാധ്യമപ്രവര്‍ത്തക ഗൗരി ലങ്കേഷിന്റെ കൊലപാതകവുമായി ബന്ധപ്പെട്ട് അറസ്റ്റിലായവര്‍ക്കു തീവ്രവലതുപക്ഷ സംഘടനയായ ശ്രീരാമസേനയുമായുള്ള ബന്ധത്തിനു കൂടുതല്‍ തെളിവുകള്‍ പുറത്തു. കൊലയാളി സംഘം ഗൗരി ലങ്കേഷിനു പുറമേ മറ്റു ചിലരെയും ടാര്‍ജറ്റ് ചെയ്തിരുന്നതായുള്ള തെളിവുകളും പുറത്തു വന്നു. പ്രശസ്ത എഴുത്തുകാരനും പദ്മ പുരസ്‌ക്കാര ജേതാവും കൂടിയായ ഗിരീഷ് കര്‍ണാട് ഉള്‍പ്പെടെ നിരവധി പേരുകള്‍ കൊലയാളികളുടെ ഹിറ്റ്‌ലിസ്റ്റില്‍ ഉള്‍പ്പെട്ടിട്ടുണ്ടെന്നാണ് സൂചന.
സാമൂഹിക പ്രവര്‍ത്തകയും എഴുത്തുകാരിയുമായ ബി.ടി ലളിതാ നായിക്, ഗുരു വീരഭദ്ര ചന്നാമല സ്വാമി, യുക്തിവാദി സി.എസ് ദ്വാരകനാഥ് തുടങ്ങിയവര്‍ ഹിറ്റ്‌ലിസ്റ്റിലുണ്ട്. ഗൗരി ലങ്കേഷ് വധം അന്വേഷിക്കുന്ന പ്രത്യേക പോലീസ് സംഘമാണ് ഇക്കാര്യം വെളിപ്പെടുത്തിയത്.ശ്രീരാമസേന പോലുള്ള തീവ്രഹിന്ദുത്വ സംഘടനകളെയും ആശയങ്ങളെയും നിരന്തരം വിമര്‍ശിക്കുന്നവരാണ് പട്ടികയില്‍ ഉള്‍പ്പെട്ട എല്ലാവരും. പോലീസ് പിടിയിലായ പ്രതികളിലൊരാളുടെ ഡയറിയിലാണ് കൊലപ്പെടുത്തേണ്ടവരുടെ പട്ടിക കണ്ടെത്തിയത്. പ്രാചീന ലിപിയായ ദേവനഗരി ലിപിയിലാണ് ഇവ എഴുതിയിരുന്നത്.
കഴിഞ്ഞ ദിവസം പിടിയിലായ വിജയപുര സ്വദേശി പരശുറാം വാഗ്മറെ ശ്രീരാമസേനയുടെ തലവന്‍ പ്രമോദ് മുത്തലിക്കിനൊപ്പം നില്‍ക്കുന്ന ചിത്രങ്ങള്‍ മാധ്യമങ്ങള്‍ പുറത്തുവിട്ടു. സമൂഹമാധ്യമങ്ങളില്‍ ഈ ചിത്രം വ്യാപകമായി പ്രചരിക്കുന്നുണ്ട്. പരശുറാം വാഗ്മറെ കേസില്‍ ഗൂഡാലോചന നടത്തിയതായി തെളിവുണ്ടെന്ന് പോലീസ് പറഞ്ഞു. വാഗ്മറെയാണ് ഗൗരി ലങ്കേഷിനു നേരെ വെടിയുതിര്‍ത്തതെന്നാണ് അന്വേഷണസംഘം കരുതുന്നത്.
അന്വേഷണത്തെ ബാധിക്കുന്നതിനാല്‍ കൂടുതല്‍ വിവരങ്ങള്‍ പുറത്തുവിടാനാവില്ലെന്നും പ്രത്യേക പോലീസ് സംഘം അറിയിച്ചു. ഗൗരി ലങ്കേഷിനെ വധിച്ച കേസില്‍ അറസ്റ്റിലാകുന്ന ആറാമത്തെയാളാണ് പരശുറാം വാഗ്മറെ. ഹിന്ദു യുവ സേന നേതാവ് കെ.ടി. നവീന്‍കുമാര്‍, അമോല്‍ കാലെ, മനോഹര്‍ ഇഡ്വെ, സുജീത്കുമാര്‍, അമിത് ദേഗ്വെകര്‍ എന്നിവരാണു നേരത്തെ അറസ്റ്റിലായത്. കാലെയും ദേഗ്വെകറും മഹാരാഷ്ട്രക്കാരാണ്. മറ്റു മൂന്നു പേരും കര്‍ണാടക സ്വദേശികളാണ്. നവീന്‍കുമാറാണ് ആദ്യം അറസ്റ്റിലായത്.
കൊലയാളികള്‍ക്ക് ശ്രീരാമസേനയുമായുള്‌ല ബന്ധം പുറത്ത് വന്നതോടെ കോണ്‍ഗ്രസും വെട്ടിലായി. തെരഞ്ഞെടുപ്പില്‍ ബിജെപിക്കെതിരെ ശ്രീരാമസനേയുള്‍പ്പടെയുള്ള സംഘടനകളെ രംഗത്തിറക്കിയത് കോണ്‍ഗ്രസാണെന്ന ആരോപണം ഉയര്‍ന്നിരുന്നു. കൊലയാളികളെ അറസ്റ്റ് ചെയ്യാന്‍ വൈകിയതും ഏറെ വിമര്‍ശനത്തിന് വഴിവച്ചിരുന്നു.
Discussion about this post