ബാങ്കുകളില്‍ നിന്നുമെടുത്ത വായ്പ തിരിച്ചടക്കാതെ നാട് വിട്ട മദ്യ വ്യവസായി വിജയ് മല്ല്യയുടെ രണ്ട് സ്വകാര്യ ഹെലികോപ്റ്ററുകള്‍ സര്‍ക്കാര്‍ ലേലത്തില്‍ വിറ്റു. 8.75 കോടി രൂപക്കായിരുന്നു ഇവ വിറ്റത്. ബംഗളൂരുവിലെ ട്രിബ്യൂണല്‍ മേല്‍നോട്ടത്തിലായിരുന്നു ലേലം നടന്നത്. ഒരു ഹെലികോപ്റ്റര്‍ 4.37 കോടി രൂപയ്ക്കായിരുന്നു ലേലത്തില്‍ വിറ്റത്.
വിജയ് മല്ല്യയുടെ കിങ്ഫിഷര്‍ എയര്‍ലൈന്‍സിനെതിരെ കേസ് ഫയല്‍ ചെയ്ത 17 ബാങ്കുകളുടെ കണ്‍സോര്‍ഷ്യത്തിന് വേണ്ടിയാണ് സര്‍ക്കാര്‍ ഹെലികോപ്റ്ററുകള്‍ ലേലത്തില്‍ വിറ്റത്.
ഹെലികോപ്റ്ററുകള്‍ ലേലത്തില്‍ നേടിയത് ന്യൂഡല്‍ഹിയിലെ ചൗധരി ഏവിയേഷന്‍ കമ്പനിയാണ്. 5 സീറ്റുകളുള്ള യൂറോകോപ്റ്റര്‍ ബി155 ഹെലികോപ്റ്ററുകളാണ് രണ്ടും. ഇവയ്ക്ക് 10 വര്‍ഷം പഴക്കമുണ്ട്. എന്നാല്‍ ഇവ ഇപ്പോഴും പ്രവര്‍ത്തനക്ഷമമാണ്. ഇതിന് മുമ്പ് 2013 സര്‍വ്വീസ് നടത്തിയ ഇവ മുംബൈയിലെ ജുഹു എയര്‍പോര്‍ട്ടിലാണ് നിലവിലുള്ളത്.
ലേലത്തില്‍ ഒരു ഹെലികോപ്റ്ററിന് 1.75 കോടിയാണ് കുറഞ്ഞ വിലയായി നിശ്ചയിച്ചിരുന്നത്. ന്യൂഡല്‍ഹിയിലെ പ്രമുഖ എയര്‍ആമ്പുലന്‍സ്, ഗ്രൗണ്ട് ഓപ്പറേഷന്‍ കമ്പനിയായ ചൗധരി ഏവിയേഷന്‍സ് ഹെലികോപ്റ്ററുകള്‍ രണ്ടും ചാര്‍ട്ടേഡ് സര്‍വീസുകള്‍ ഉള്‍പ്പടെയുള്ള വ്യവസായ ആവശ്യങ്ങള്‍ക്കായിരിക്കും ഉപയോഗിക്കുക എന്ന് ഡയറക്ടര്‍ സത്യേന്ദ്ര സെഹ്രാവത് വ്യക്തമാക്കിയിട്ടുണ്ട്.
Discussion about this post