തൊടുപുഴയിലെ സ്വകാര്യ ആശുപത്രിയില്‍ രാത്രി പര്‍ദ്ദ ധരിച്ചെത്തിയ പോലീസുകാരന് സസ്‌പെന്‍ഷന്‍ നല്‍കി. കുളമാവ് പൊലീസ് സ്റ്റേഷനിലെ സീനിയര്‍ സിവില്‍ പൊലീസ് ഓഫിസര്‍ കുമ്മംകല്ല് സ്വദേശി നൂര്‍ സമീറിനെ ആണ് ഇടുക്കി ജില്ലാ പൊലീസ് മേധാവി കെ.ബി. വേണുഗോപാല്‍ സസ്‌പെന്‍ഡ് ചെയ്തത്. ഇയാള്‍ രാത്രി ഒരു സ്വകാര്യ ആശുപത്രിയുടെ പ്രസവ വാര്‍ഡിലൂടെ ചുറ്റിക്കറങ്ങുകയായിരുന്നു. ഇത് കണ്ട ചില സ്ത്രീകള്‍ക്ക് സംശയം തോന്നുകയുണ്ടായി. തുടര്‍ന്ന് ഇയാള്‍ പുരുഷനാണെന്നു തിരിച്ചറിഞ്ഞതോടെ ഇയാള്‍ പുറത്തിറങ്ങി ഓടുകയായിരുന്നു. സുരക്ഷാ ജീവനക്കാര്‍ തടഞ്ഞുനിര്‍ത്തിയപ്പോള്‍ പര്‍ദ മാറ്റിയശേഷം പൊലീസുകാരനാണെന്നു പറഞ്ഞു കടന്നു.
നൂര്‍ സമീര്‍ എന്ന പോലീസുകാരനാണ് സസ്‌പെന്‍ഷന്‍ ലഭിച്ചത്. ഇയാള്‍ക്കെതിരെ ആള്‍മാറാട്ടത്തിന് കേസെടുത്തിട്ടുണ്ട്. സ്‌പെഷല്‍ ബ്രാഞ്ച് ഡി.വൈ.എസ്.പി നല്‍കിയ റിപ്പോര്‍ട്ടിനെ തുടര്‍ന്നാണു സസ്‌പെന്‍ഷന്‍. ഇയാള്‍ക്കെതിരെ വകുപ്പ് തല അന്വേഷണവും നടത്തുന്നുണ്ട്.
ഇതിന് മുമ്പ് മുഖ്യമന്ത്രിയുടെ ഗുണ്ടാവിരുദ്ധ സ്‌ക്വാഡിലെ അംഗങ്ങളെന്നു ഭീഷണിപ്പെടുത്തി കഞ്ചാവു വില്‍പ്പനക്കാരനില്‍ നിന്നു 96,000 രൂപ തട്ടിയെടുത്ത കേസില്‍ നൂര്‍ സമീറിനെ കൂടാതെ, പൊലീസുകാരായ മുജീബ് റഹ്മാന്‍, സുനീഷ് കുമാര്‍ എന്നിവരെ 2017 ജനുവരിയില്‍ പാലക്കാടു നിന്ന് അറസ്റ്റ് ചെയ്തു ജയിലിലടച്ചിരുന്നു.
ഇതെത്തുടര്‍ന്നു സസ്‌പെന്‍ഷനിലായിരുന്ന മൂവരെയും അടുത്തിടെയാണു തിരിച്ചെടുത്തത്.
Discussion about this post