പ്രളയ ദുരന്തത്തില് നിന്നും കേരളത്തെ കരയകയറ്റാന് വേണ്ടി മുഖ്യമന്ത്രി പിണറായി വിജയന് തുടങ്ങിയ സാലറി ചാലഞ്ചില് നിന്നും വിട്ടുനിന്ന പോലീസ് ഉദ്യോഗസ്ഥര്ക്ക് അധിക ഡ്യൂട്ടി നല്കുന്നുവെന്ന് ആരോപണം. ഡ്യൂട്ടിക്കിടെ ഒരു പോലീസ് ഉദ്യോഗസ്ഥ കുഴഞ്ഞ് വീഴുകയും ചെയ്തു.
സാലറി ചാലഞ്ചില് നിന്നും വിട്ടുനിന്ന ഉദ്യോഗസ്ഥരെ സ്ഥലംമാറ്റുകയും അധിക ജോലിയെടുപ്പിക്കുകയും ചെയ്യുന്നുണ്ടെന്നാണ് വിമര്ശനം. സാലറി ചലഞ്ചില് പങ്കെടുക്കാത്ത ഇടുക്കിയിലെ അറുപതോളം പൊലീസുകാര്ക്ക് മൂന്നാറിലെ രാജമലയിലേക്ക് സ്ഥലം മാറ്റം ലഭിച്ചിരുന്നു. വിദൂര സ്ഥലങ്ങളായ വാഗമണ്, കുമളി, മുരിക്കാശ്ശേരി തുടങ്ങിയ സ്ഥലങ്ങളില് നിന്നുള്ള വനിതകളടക്കമുള്ള പൊലീസുകാരെയാണ് രാജമലയില് നിയോഗിച്ചിരിക്കുന്നത്. ഒരാഴ്ചയായി ഇവര് മൂന്നാറിലാണ്.
ഇവരുടെ ഡ്യൂട്ടി സമയം രാവിലെ ഏഴ് മുതല് രാത്രി ഒന്പത് വരെയാണ്. ആഴ്ചയിലൊരിക്കല് പോലും അവധി നല്കുന്നില്ലെന്നും പോലീസുകാര് പറയുന്നു. പഴയ മൂന്നാറിലെ വനംവകുപ്പിന്റെ ടിക്കറ്റ് കൗണ്ടറില് ഡ്യൂട്ടിയിലുണ്ടായിരുന്ന സിവില് പൊലീസ് ഓഫീസര് സിന്ധു കുഴഞ്ഞ് വീഴുകയും ചെയ്തു. ഇവര് പനിയായതിനാല് അവധിയ്ക്ക് അപേക്ഷ നല്കിയിരുന്നു. എന്നാല് മൂന്നാറില് നീലക്കുറിഞ്ഞി പൂത്ത് നില്ക്കുന്നതിനാല് സഞ്ചാരികള് കൂടുതലാണെന്നും അത് മൂലം അവധി നല്കാനാകില്ലെന്നും അധികൃതര് പറയുകയായിരുന്നു.
കുഴഞ്ഞു വീണ സിന്ധുവിനെ വനപാലകരായിരുന്നു ആശുപത്രിയിലെത്തിച്ചത്. ഡ്യൂട്ടി മാറാന് ആളില്ലാത്തതിനാലാണ് വനപാലകര് ആശുപത്രിയിലെത്തിച്ചത്. സിന്ധു പ്രസവാവധിക്ക് ശേഷം ഡ്യൂട്ടിയില് തിരികെ പ്രവേശിച്ചിട്ട് അധികം നാളായിട്ടില്ല.
അതേസമയം ആരോപണങ്ങള് നിഷേധിക്കുകയാണ് ജില്ലയിലെ ഉദ്യോഗസ്ഥര് ചെയ്യുന്നത്. നീലക്കുറിഞ്ഞി സീസണിലെ തിരക്ക് നിയന്ത്രിക്കാന് വേണ്ടിയാണ് കൂടുതല് പോലീസുകാരെ നിയമിച്ചതെന്നാണ് അവരുടെ വിശദീകരണം.
Discussion about this post