ബി.ജെ.പി ദേശീയ അധ്യക്ഷന് അമിത് ഷായുടെ കണ്ണൂരിലെ പ്രസ്താവന ആര്.എസ്.എസിന്റെയും സംഘപരിവാറിന്റെ യഥാര്ത്ഥ ഉള്ളിലിരിപ്പാണ് പുറത്ത് കൊണ്ടുവന്നിരിക്കുന്നതെന്ന് മുഖ്യമന്ത്രി പിണറായി വിജയന് ഫേസ്ബുക്ക് പോസ്റ്റിലൂടെ അഭിപ്രായപ്പെട്ടു. സംസ്ഥാന സര്ക്കാരിനെ താഴെയിറക്കുമെന്ന അമിത് ഷായുടെ പ്രസ്താവന ജനവിധിയെ അട്ടിമറിക്കുമെന്ന സന്ദേശമാണ് നല്കുന്നതെന്നും അദ്ദേഹം പറഞ്ഞു.
കണ്ണൂരില് ബി.ജെ.പിയുടെ ജില്ലാ ഓഫീസ് ഉദ്ഘാടനത്തിന് ശേഷം ജനങ്ങളോട് സംസാരിക്കുമ്പോളായിരുന്നു അമിത് ഷാ ശബരിമല വിഷയത്തെപ്പറ്റി സംസാരിച്ചത്. ഭക്തരുടെ വികാരങ്ങളെ മാനിക്കാതെ അവരുടെ മേല് സര്ക്കാരിന്റെ നയങ്ങള് അടിച്ചേല്പ്പിക്കാന് ശ്രമിച്ചാല് സര്ക്കാരിനെ താഴെയിറക്കാനും ബി.ജെ.പി തയ്യാറാണെന്ന് അദ്ദേഹം പറഞ്ഞിരുന്നു.
അദ്ദേഹത്തിന്റെ പ്രസ്താവന സുപ്രീം കോടതിക്കും ഭരണഘടനയ്ക്കും നിയമവ്യവസ്ഥയ്ക്കും എതിരാണെന്ന് മുഖ്യമന്ത്രി അഭിപ്രായപ്പെട്ടു. അമിത് ഷായുടെ പ്രസ്താവനക്കെതിരെ ജനാധിപത്യ വിശ്വാസികളാകെ ശബ്ദമുയര്ത്തണമെന്ന് അദ്ദേഹം പറഞ്ഞു.
ഫേസ്ബുക്ക് പോസ്റ്റിന്റെ പൂര്ണ്ണ രൂപം:
ബിജെപി പ്രസിഡന്റ് അമിത്ഷായുടെ കണ്ണൂരിലെ പ്രസ്താവന സംസ്ഥാന ഗവണ്മെന്റിനെതിരെ എന്നതിനേക്കാള് സുപ്രീംകോടതിക്കും ഭരണഘടനയ്ക്കും നിയമവ്യവസ്ഥയ്ക്കും എതിരെയുള്ളതാണ്.
നടപ്പാക്കാനാകുന്ന വിധി മാത്രം പറഞ്ഞാല് മതി കോടതി എന്ന അമിത്ഷായുടെ പ്രസ്താവന, ഭരണഘടന ഉറപ്പുനല്കുന്ന മൗലികാവകാശങ്ങള് നടപ്പാക്കാനുള്ളതല്ല എന്ന സന്ദേശമാണ് നല്കുന്നത്. ആര്എസ്എസിന്റെയും സംഘപരിവാറിന്റെയും യഥാര്ത്ഥ ഉള്ളിലിരിപ്പു തന്നെയാണ് അമിത്ഷായുടെ പ്രസ്താവനയിലൂടെ പുറത്തുവന്നിട്ടുള്ളത്.
സ്ത്രീ-പുരുഷ സമത്വം ക്ഷേത്രപ്രവേശനത്തിലൂടെയല്ല ഉറപ്പുവരുത്തേണ്ടത് എന്നുള്ള വാദം, ജാതിയടിസ്ഥാനത്തിലുള്ള വിവേചനം നിര്ത്തലാക്കേണ്ടത് നിയമത്തിലൂടെയല്ല എന്ന വാദത്തിന്റെ മുന്നോടിയാണ്. സ്ത്രീയും പുരുഷനും തുല്യരല്ല എന്ന പഴയ മനുസ്മൃതി വാദത്തില്ത്തന്നെയാണ് തങ്ങള് ഇപ്പോഴും നില്ക്കുന്നത് എന്നാണ് അമിത്ഷായുടെ വാക്കുകള് വ്യക്തമാക്കുന്നത്. ജനാധിപത്യമടക്കമുള്ള ആധുനിക സങ്കല്പങ്ങള് മുമ്പോട്ടുവെയ്ക്കുന്ന തുല്യത മൗലികാവകാശങ്ങള് തുടങ്ങിയവ ഉയര്ത്തിപ്പിടിക്കുന്ന പൊതുസമൂഹമൊന്നാകെ ഇത്തരം പ്രാകൃത വാദങ്ങള്ക്കെതിരെ അണിനിരക്കേണ്ടതുണ്ട്.
ഗവണ്മെന്റിനെ വീഴ്ത്തുമെന്നു ഭീഷണിപ്പെടുത്തുന്ന അമിത്ഷാ ഈ ഗവണ്മെന്റ് അധികാരത്തിലുള്ളത് ബിജെപിയുടെ ദയാദാക്ഷിണ്യങ്ങളിലൂടെയല്ല, മറിച്ച് സംസ്ഥാനത്തെ ജനങ്ങളുടെ വിധിതീര്പ്പിലൂടെയാണ് എന്നത് ഓര്ക്കണം. ആ ജനവിധിയെ അട്ടിമറിക്കുമെന്ന സന്ദേശമാണ് അമിത്ഷാ തന്റെ പ്രസ്താവനയിലൂടെ നല്കുന്നത്. ജനാധിപത്യ വിശ്വാസികളാകെ ഇതിനെതിരെ ശബ്ദമുയര്ത്തണം. പരമോന്നത നീതിപീഠമായ സുപ്രീംകോടതിയുടെ വിധി നടപ്പിലാക്കുന്നതിന്റെയും ഭരണഘടന ഉറപ്പുനല്കുന്ന മൗലികാവകാശങ്ങള് സംരക്ഷിക്കുന്നതിന്റെയും പേരിലാണ് ജനാധിപത്യപരമായി തെരഞ്ഞെടുക്കപ്പെട്ട സംസ്ഥാന സര്ക്കാരിനെ താഴെയിറക്കുമെന്ന് ഭീഷണിപ്പെടുത്തുന്നത് എന്നതും ശ്രദ്ധിക്കപ്പെടേണ്ടതാണ്.
Discussion about this post