ഇന്ത്യന്‍ മിസ്സൈല്‍നിര്‍മ്മാണ കമ്പനിയായ ലാര്‍സണ്‍ ആന്‍ഡ് ട്യൂബ്രോയും ഫ്രഞ്ച് കമ്പനിയായ എംബിഡിഎ യും ഇന്ത്യയില്‍ മിസ്സൈല്‍ നിര്‍മ്മാണ ഫാക്ടറി ആരംഭിക്കുന്നതിനായി ലൈസന്‍സിന് അപേക്ഷിച്ചു. ഇരു കമ്പനികളും സംയുക്തമായി ആരംഭിക്കാനാണ് തീരുമാനം. കോയമ്പത്തൂരില്‍് മിസൈല്‍ നിര്‍മ്മാണ ഫാക്ടറി തുടങ്ങണം എന്നാണ് കമ്പനികളുടെ തീരുമാനം.
മേക് ഇന്‍ ഇന്ത്യാ പദ്ധതിയുടെ വലിയൊരു മുന്നേറ്റമായിരിയ്ക്കും ഈ ഫാക്ടറിയെന്ന് വിലയിരുത്തപ്പെടുന്നു. കോയമ്പത്തൂരിലെ അസ്‌പെന്‍ സ്‌പെഷ്യല്‍ എക്‌ണോമിക് സോണില്‍ ആവും ഈ ഫക്ടറി നിര്‍മ്മിയ്ക്കുക.
1959ലെ ആയുധനിയമമനുസ്സരിച്ച് ലഭിയ്ക്കുന്ന വ്യാവസായിക ലൈന്‍സന്‍സ് നല്‍കേണ്ടത് ആഭ്യന്തരമന്ത്രാലയമാണ്. വാണിജ്യമന്ത്രാലയത്തിന്റെ കൂടി ലൈസന്‍സ് നേടിക്കഴിഞ്ഞാല്‍ ഫാക്ടറിയുടെ ആദ്യഘട്ടപ്രവര്‍ത്തനങ്ങള്‍ ആരംഭിയ്ക്കും. നവംബര്‍ അഞ്ചിനാണ് വാണിജ്യമന്ത്രാലയം ലൈസന്‍സിനുള്ള അപേക്ഷ പരിഗണിയ്ക്കുന്നതെന്നറിയുന്നു.
ഇന്ത്യന്‍ കമ്പനിയായ ലാര്‍സണ്‍ ആന്‍ഡ് ട്യൂബ്രോയ്ക്കായിരിയ്ക്കും സംയുക്തസംരംഭത്തിന്റെ 51 ശതമാനം ഓഹരിയും. എംബിഡിഎ ലോകത്തെ ഏറ്റവും വലിയ മിസൈല്‍ നിര്‍മ്മാതാക്കളിലൊന്നായ കമ്പനിയാണ്. ആദ്യകാല യുദ്ധവിമാനങ്ങളുള്‍പ്പെടെ നിര്‍മ്മിച്ചിരുന്ന ബിഎഇ എയ്രോസ്‌പേസ് ലിമിറ്റഡും എയര്‍ബസിന്റെ മിസൈല്‍ നിര്‍മ്മാണ യൂണിറ്റും ചേര്‍ന്നുണ്ടാക്കിയ കമ്പനിയാണ് എംബിഡിഎ. ലാര്‍സണ്‍ ആന്‍ഡ് ട്യൂബ്രോ ഇപ്പോള്‍ത്തന്നെ ഇന്ത്യന്‍സേനകള്‍ക്കായും എംബിഡിഎയ്ക്കായും മിസൈല്‍ ഭാഗങ്ങള്‍ ഉണ്ടാക്കുന്നുണ്ട്.
ഈ പദ്ധതി പൂര്‍ത്തിയായാല്‍ ഇന്ത്യയില്‍ പൂര്‍ണ്ണമായും ഉണ്ടാക്കിയ മിസൈലുകള്‍ യൂറോപ്പിലേക്ക് കയറ്റുമതി ചെയ്യും. നാനൂറു കോടി രൂപയാണ് ആദ്യഘട്ടത്തില്‍ ചിലവ് പ്രതീക്ഷിയ്ക്കുന്നത്. ആന്റിടാങ്ക് ഗൈഡഡ് മിസൈല്‍, മീഡീയം റേഞ്ച് സര്‍ഫസ് ടു എയര്‍ മിസൈല്‍ എന്നീ മിസൈലുകള്‍ ഇവിടെനിന്ന് കയറ്റുമതി ചെയ്യും. മിസൈലിന്റെ പോര്‍മുന (സ്‌ഫോടകശക്തിയുള്ള ഭാഗം) ഒഴിച്ചുള്ള ഭാഗങ്ങളാണ് നിര്‍മ്മിച്ച് കയറ്റിയയയ്ക്കുക.
അന്താരാഷ്ട്ര ആയുധവിപണിയിലേക്ക് കാലെടുത്ത് വയ്ക്കാന്‍ ഇന്ത്യ ഒരുങ്ങിക്കഴിഞ്ഞതിന്റെ സൂചനകളായി വിദഗ്ധര്‍ ഇതിനെ വിലയിരുത്തുന്നു. മേക് ഇന്‍ ഇന്ത്യാ പദ്ധതിയുടെ വലിയ വിജയങ്ങളിലൊന്നാവും ഇതെന്ന് കരുതപ്പെടുന്നു.
Discussion about this post