സാലറി ചാലഞ്ചില് നിന്ന് വിട്ടുനിന്ന ഉദ്യോഗസ്ഥരുടെ ശമ്പളം വൈകുന്നു. സമ്മതപത്രം നല്കിയ ഓഫീസുകളുടെ ബില്ലുകള് മാത്രമാണ് ഇപ്പോള് മാറുന്നത്. ശമ്പള വിതരണത്തിന്റെ ആദ്യ ദിനം അയ്യായിരത്തോളം ബില്ലുകള് മാത്രമാണ് മാറിയിട്ടുള്ളത്.
ശമ്പള ബില്ലുകള് ട്രഷറികളില് എത്തിയ ശേഷം മാത്രം സാലറി ചാലഞ്ചിന്റെ വിസമ്മത പത്രം മതിയെന്ന് വ്യവസ്ഥയാണ് സുപ്രീം കോടതി റദ്ദാക്കിയത്. ഇതോടെ സാലറി ചലഞ്ചിന്റെ ഭാഗമാകാന് തയ്യാറുളളവരില് നിന്ന് ഡിഡിഒമാര് സമ്മതപത്രം നല്കണമെന്ന് കാട്ടി ധനവകുപ്പ് ആദ്യ സര്ക്കുലര് ഇറക്കിയിരുന്നു. തുടര്ന്ന് സമ്മതപത്രം സമര്പ്പിക്കാതെ ബില്ലുകള് നല്കിയ ഡിഡിഒമാര് അവ തിരികെ വാങ്ങി തിരുത്തല് വരുത്തി ബില്ലുകള് വീണ്ടും സമര്പ്പിക്കണമെന്ന് കാണിച്ച് രണ്ടാമത്തെ സര്ക്കുലറും വന്നു. ഇതോടെ സാലറി ചാലഞ്ചിന്റെ ഭാഗമാകാന് സന്നദ്ധത അറിയിച്ച ഓഫീസുകളുടെ ബില്ലുകള് മാത്രമെ മാറാന് കഴിയൂ എന്ന സ്ഥിതി വന്നു.
ശമ്പള വിതരണത്തിന്റെ ആദ്യദിവസം സാധാരണ ഗതിയില് ഒരു ലക്ഷത്തിലേറെ ജീവനക്കാരുടെ ബില്ലുകളാണ് വിതരണം ചെയ്യാറുളളത്. എന്നാല് ഇത്തവണ ആദ്യ ദിനം ഏകദേശം അയ്യായിരത്തോളം ബില്ലുകളിലായി അമ്പതിനായിരത്തോളം ജീവനക്കാരുടെ ശമ്പളമാണ് വിതരണം ചെയ്തത്.
Discussion about this post