ശബരിമലയില് ചിത്തിര ആട്ടവിശേഷത്തിനായി നട തുറന്ന വേളയില് ദേവസ്വം ബോര്ഡംഗം കെ.പി.ശങ്കര്ദാസ് ആചാരലംഘനം നടത്തിയെന്ന് ആരോപണം. നട തുറന്നതിന് ശേഷം ആഴിയില് ദീപം നല്കുന്ന ചടങ്ങിനായി മേല്ശാന്തിയുടെയും തന്ത്രിയുടെയും കൂടെ കെ.പി.ശങ്കര്ദാസ് ഇരുമുടിക്കെട്ടില്ലാതെ കയറുകയും ഇറങ്ങുകയും ചെയ്തെന്നാരോപണം.
ശങ്കരദാസിന്റെ പ്രവൃത്തി സത്യപ്രതിജ്ഞാ ലംഘനവും കോടതിയലക്ഷ്യവുമാണെന്നും ഭക്തര് വിമര്ശിക്കുന്നു. ഇന്നലെ വൈകീട്ടായിരുന്നു ശബരിമല നട തുറന്നത്.
ശബരിമല തന്ത്രിക്കും മേല്ശാന്തിക്കും പന്തളം രാജകുടുംബാംഗങ്ങള്ക്കും മാത്രമാണ് ഇരുമുടിക്കെട്ടില്ലാതെ പതിനെട്ടാം പടി കയറാനാവുക എന്ന് ആചാര്യന്മാര് വ്യക്തമാക്കുന്നു. ഇത് കൂടാതെ തിരുവാഭരണവുമായി വരുന്ന വ്യക്തിക്കും ഇരുമുടിക്കെട്ടില്ലാതെ പതിനെട്ടാം പടി ചവിട്ടാനാകുമെന്നും അവര് വ്യക്തമാക്കുന്നു.
അതേസമയം ഇന്ന് രാവിലെ ആര്.എസ്.എസ് നേതാവ് വത്സന് തില്ലങ്കേരി ഇരുമുടിക്കെട്ടില്ലാതെ പതിനെട്ടാം പടി കയറിയെന്ന് ശങ്കര്ദാസ് ആരോപിച്ചിരുന്നു. എന്നാല് താന് ആചാരലംഘനം നടത്തിയില്ലെന്നും ഇരുമുടിക്കെട്ടോട് കൂടിയാണ് പതിനെട്ടാം പടി കയറിയതെന്നും സി.സി.ടി.വി ദൃശ്യങ്ങള് പരിശോധിച്ചാല് ഇക്കാര്യം വ്യക്തമാകുമെന്നും വത്സന് തില്ലങ്കേരി വ്യക്തമാക്കി.
അതേസമയം ഇരുമുടിക്കെട്ടില്ലാതെ പതിനെട്ടാം പടി കയറിയത് ആചാരലംഘനം തന്നെയാണെന്ന് ശബരിമല തന്ത്രി കണ്ഠര് രാജീവര് പറഞ്ഞു . ആചാര പ്രകാരം തന്ത്രിക്കും, മേല്ശാന്തിയ്ക്കും , പന്തളംകൊട്ടാരം പ്രതിനിധികള്ക്കും മാത്രമേ ഇരുമുടിക്കെട്ടില്ലാതെ പടികയറാന് സാധിക്കുകയുള്ളൂവെന്നും തന്ത്രി വ്യക്തമാക്കി .
ആചാരപ്രകാരം മുകളില് പറഞ്ഞവര് ഒഴികെയെല്ലാവരും ഇരുമുടിക്കെട്ടുമായി വേണം പടികയറുവാന് . ആചാരലംഘനം നടന്നതായി ബോധ്യപ്പെട്ടാലോ പരാതിവരികയോ ചെയ്താല് പരിഹാര ക്രിയകള് ചെയ്യുമെന്നും തന്ത്രി പറഞ്ഞു .
Discussion about this post