ശബരിമലയില്‍ കര്‍ശന നിയന്ത്രണമൊരുക്കി പോലീസ് . സന്നിധാനത്ത് നട അടക്കുമ്പോള്‍ തന്നെ അവിടെയുള്ള ഹോട്ടലുകള്‍ കടകള്‍ അടയ്ക്കണമെന്ന് പോലീസ് നിര്‍ദേശം നല്‍കി . അപ്പം അരവണ കൌണ്ടര്‍ രാത്രി പത്ത് മണിക്കും , നട അടച്ച ശേഷം ഒരു കടകളും തുറക്കാന്‍ പാടില്ലെന്നും , രാത്രി സന്നിധാനത്ത് ആരെയും താങ്ങാന്‍ അനുവദിക്കില്ലെന്നും പോലീസ് വ്യക്തമാക്കി .
മണ്ഡല മകരവിളക്ക് പൂജയ്ക്കായി ശബരിമല 24 മണിക്കൂര്‍ പ്രസാദ കൌണ്ടര്‍ തുറന്നിരിക്കുകയായിരുന്നു പതിവ് . എന്നാല്‍ ഇത്തവണ അരവണ, അപ്പം കൌണ്ടര്‍ 10 മണിക്ക് ശേഷം തുറക്കരുത് എന്ന് പോലീസ് രേഖാമൂലം അധികൃതര്‍ക്ക് കത്ത് നല്‍കിയത് വഴി ദേവസ്വം ബോര്‍ഡിനു കനത്ത സാമ്പത്തിക നഷ്ടമുണ്ടാക്കും . നെയ്യഭിഷേകത്തെയും പോലീസ് നിയന്ത്രണം ബാധിക്കും .
സന്നിധാനത്തെ ദേവസ്വത്തിന്റെ ഒരു മുറിയിലും രാത്രി ആരെയും താമസിപ്പിക്കരുതെന്ന് പോലീസ് നിര്‍ദേശം നല്‍കിയിട്ടുണ്ട് . രാത്രി പത്ത് മണിയോടെ മുറികള്‍ പൂട്ടി താക്കോല്‍ പോലീസിനെ എല്പ്പിക്കണമെന്ന് ദേവസ്വത്തിന് പോലീസ് നോട്ടീസ് നല്‍കി . ദേവസ്വം ബോര്‍ഡ് പ്രസിഡന്റ്‌ , മന്ത്രി തുടങ്ങിയവരുമായി കൂടിയാലോചനയ്ക്ക് ശേഷം ഇതിലെന്ത് നടപടി സ്വീകരിക്കണമെന്ന് തീരുമാനിക്കുമെന്നാണ് സൂചന .
പോലീസിന്റെ കടുത്ത നിയന്ത്രണത്തില്‍ കടകള്‍ ലേലത്തിലെടുത്ത വ്യപാരികള്‍ അസംതൃപ്തിയിലാണ് . വന്‍തുക നല്‍കിയാണ്‌ കടകള്‍ ലേലത്തില്‍ എടുത്തിരിക്കുന്നത് . അന്നൊന്നും ഇക്കാര്യം സൂചിപ്പിച്ചിരുന്നില്ല . ഇത്തരമൊരു നിയന്ത്രണം ഇപ്പോള്‍ കൊണ്ട് വരുന്നത് വഴി വന്‍ നഷ്ടമുണ്ടാക്കുമെന്ന് കടക്കാര്‍ പരാതിപ്പെടുന്നു .
ശബരിമലമുതല്‍ പ്ലാപ്പള്ളി വരെ ദേവസ്വത്തിന്റെ 220 കടകളില്‍ നൂറിനു അടുത്ത് മാത്രമാണ് ഇതുവരെ ലേലത്തില്‍ പോയിട്ടുള്ളത് . ഇന്ന് വൈകിട്ട് വീണ്ടും ലേലം നടക്കാന്‍ ഇരിക്കുന്നതിനു ഇടയിലാണ് പോലീസിന്റെ കര്‍ശന നിയന്ത്രണം വന്നിരിക്കുന്നത് . ലേലത്തെ ഇത് കാര്യമായി ബാധിക്കുമെന്ന ആശങ്ക ദേവസ്വം എക്സിക്യൂട്ടീവ് ഓഫീസര്‍ അറിയിച്ചു .
Discussion about this post