ഐഎസ്ആര്‍ഒ ചാരക്കേസില്‍ നമ്പി നാരായണനെ പീഡിപ്പിക്കാന്‍ മുന്‍ പൊലീസ് മേധാവി ടിപി സെന്‍കുമാറും കൂട്ടു നിന്നു എന്ന കുറ്റം ആരോപിച്ച് സംസ്ഥാന സര്‍ക്കാര്‍. ഹൈക്കോടതിയില്‍നല്‍കിയ റിപ്പോര്‍ട്ടിലാണ് പുതിയ ആരോപണം. അഡ്മിനിസ്‌ട്രേറ്റിവ് ട്രിബ്യൂണലിലേക്കുള്ള തന്റെ നിയമനം സര്‍ക്കാര്‍ വൈകിക്കുന്നുവെന്ന് കാണിച്ച് സെന്‍കുമാര്‍ നല്‍കിയ ഹര്‍ജിക്കുള്ള മറുപടിയിലാണ് പുതിയ കുരുക്കിട്ടിരിക്കുന്നത്. ചാരക്കേസില്‍ പ്രതിചേര്‍ക്കപ്പെട്ട നമ്പി നാരായണനെ പീഡിപ്പിക്കാന്‍ സെന്‍കുമാറും ശ്രമിച്ചുവെന്നാണ് കണ്ടെത്തല്. നഷ്ടപരിഹാരം ആവശ്യപ്പെട്ടുള്ള നമ്പി നാരായണന്റെ പരാതിയില്‍ ഏഴാം എതിര്‍കക്ഷിയായി സെന്‍കുമാറിനെ ചേര്‍ത്തിട്ടുണ്ട്.
ഇകെ നായനാര്‍ മന്ത്രിസഭയുടെ കാലത്ത് സര്‍ക്കാര്‍ ഉത്തരവ് പ്രകാരം ചാരക്കേസ് പുനരന്വേഷിക്കാന്‍ സെന്‍കുമാര്‍ നിയോഗിക്കപ്പെട്ടു എന്നതിന്റെ പേരിലാണ് ആരോപണം. കോടതിയുടെ അനുമതി വാങ്ങി അന്വേഷണം തുടങ്ങിയെങ്കിലും സുപ്രീംകോടതി ഇടപെട്ട് റദ്ദാക്കിയിരുന്നു. കോടതിയെ തെറ്റിദ്ധരിപ്പിച്ച് സെന്‍കുമാര്‍ തുടരന്വേഷണത്തിന് അനുമതി വാങ്ങിയെന്ന വാദമാണ് ഈ സത്യവാങ്മൂലത്തില്‍ സര്‍ക്കാര്‍ ഉന്നയിക്കുന്നത്. സിബിഐ അന്വേഷിച്ച കേസ് തിരികെ !വാങ്ങി തുടരന്വേഷണം നടത്താനുള്ളത് അന്നത്തെ ഇടതു സര്‍ക്കാരിന്റെ തീരുമാനമായിരുന്നു. ഉദ്യോഗസ്ഥനെന്ന നിലയില്‍ അതിന് വഴങ്ങി പ്രവര്‍ത്തിച്ചതിന്റ പേരിലുള്ള ഇപ്പോഴത്തെ സര്‍ക്കാര്‍ നീക്കം നായനാര്‍ സര്‍ക്കാരിന്റെ നിലപാടിനെ തള്ളിപ്പറയുന്നതാണെന്നുള്ള വിമര്‍ശനം ഉയരുന്നുണ്ട്.
നേരത്തെ ചുമത്തിയ മൂന്നുകേസുകള്‍ അടിസ്ഥാനമില്ലെന്ന് കണ്ട് ഹൈക്കോടതി തള്ളിക്കളഞ്ഞ ശേഷമാണ് ഇപ്പോഴത്തെ നീക്കം.
സേുപ്രീംകോടതി വരെ നീണ്ട നിയമയുദ്ധത്തിനൊടുവില്‍ സര്‍ക്കാരിനെ !തോല്‍പിച്ച് പൊലീസ് മേധാവിക്കസേരയില്‍ തിരിച്ചെത്തിയ സെന്‍കുമാര്‍ രണ്ടു വര്‍ഷത്തിനിടെ മൂന്നു ക്രമിനില്‍ കേസുകളില്‍ പ്രതി ചേര്‍ക്കപ്പെട്ടു. മൂന്നിനും നിലനില്‍പില്ലെന്ന് കണ്ട് തള്ളിക്കളഞ്ഞ അതേ ഹൈക്കോടതിക്ക് മുന്നിലാണ് പുതിയ കുറ്റം ആരോപിച്ച് സര്‍ക്കാര്‍ റിപ്പോര്‍ട്ടുമായി എത്തിയിരിക്കുന്നത്.
Discussion about this post