നിയമസഭാ തിരഞ്ഞെടുപ്പ് നടക്കാനിരിക്കുന്ന തെലങ്കാനയില്‍ ടി.ആര്‍.എസ് നേതാവ് ചന്ദ്രശേഖര റാവുവിനെതിരെ രൂക്ഷ വിമര്‍ശനവുമായി പ്രധാനമന്ത്രി നരേന്ദ്ര മോദി രംഗത്ത്. നിസാമാബാദ് പ്രദേശത്തെ ലണ്ടനെപ്പോലെയാക്കാമെന്ന് ചന്ദ്രശേഖര റാവു പറഞ്ഞിരുന്നുവെന്നും നിലവില്‍ നിസാമാബാദ് വികസനം ലഭിക്കാതെയിരിക്കുകയാണെന്നും അദ്ദേഹം ചൂണ്ടിക്കാട്ടി. കോണ്‍ഗ്രസിനെ പോലെത്തന്നെ പ്രവര്‍ത്തനം നടത്താതെ ഭരണ നടത്താമെന്നാണ് തെലങ്കാന മുഖ്യമന്ത്രിയും കുടുംബവും വിചാരിക്കുന്നതെന്നും അദ്ദേഹം പറഞ്ഞു. തിരഞ്ഞെടുപ്പ് പ്രചരണത്തിന്റെ ഭാഗമായി ഒരു റാലിയില്‍ പങ്കെടുത്ത് സംസാരിക്കുകയായിരുന്നു അദ്ദേഹം.
രണ്ട് മാസം മുന്‍പ് ആയുഷ്മാന്‍ ഭാരത് പദ്ധതി നടപ്പാക്കിയെങ്കിലും ചന്ദ്രശേഖര റാവുവിന്റെ മോശം ഭരണം മൂലം തെലങ്കാനയിലെ ഒരാള്‍ക്ക് പോലും പദ്ധതിയുടെ ലാഭം കിട്ടിയില്ലെന്നും മോദി ചൂണ്ടിക്കാട്ടി. കോണ്‍ഗ്രസും ടി.ആര്‍.എസും വംശ രാഷ്ട്രീയത്തിലാണ് വിശ്വസിക്കുന്നതെന്നും ഇരുവരും ഒരു നാണയത്തിന്റെ രണ്ട് വശങ്ങളാണെന്നും മോദി ആരോപിച്ചു. ഇരു പാര്‍ട്ടികളും വോട്ട് ബാങ്ക് രാഷ്ട്രീയം കളിക്കുന്നവരാണെന്നും പാര്‍ട്ടിക്കുള്ളില്‍ ജനാധിപത്യമില്ലെന്നും മോദി പറഞ്ഞു.
വികസനത്തില്‍ വിശ്വസിക്കുന്നവരും പുതിയ ഇന്ത്യയെ നിര്‍മ്മിക്കാനാഗ്രഹിക്കുന്നവരും വിശ്വാസമര്‍പ്പിക്കുന്നത് ബി.ജെ.പിയിലാണെന്നും അദ്ദേഹം പറഞ്ഞു.
ഡിസംബര്‍ ഏഴിനാണ് തെലങ്കാനയില്‍ തിരഞ്ഞെടുപ്പ് നടക്കുക.
Discussion about this post