സര്‍ക്കാരിന്റെ ആഭിമുഖ്യത്തില്‍ ജനുവരി ഒന്നിന് സംസ്ഥാനത്ത് സംഘടിപ്പിക്കുന്ന വനിതാമതിലില്‍ പങ്കെടുക്കില്ലെന്ന് നിലപാട് തിരുത്തിയ മഞ്ജുവാരിയര്‍ക്കെതിരെ മന്ത്രി ജി സുധാകരന്‍ . നടി മഞ്ജുവാരിയരുടെ സാമൂഹികബോധത്തിന്റെ കണ്ണാടി മാറണമെന്ന് മന്ത്രി പ്രതികരിച്ചു .
ആദ്യം വനിതാമതിലില്‍ പങ്കെടുക്കുമെന്ന് അറിയിച്ച മഞ്ജുവാരിയര്‍ പിന്നീട് തന്റെ നിലപാട് തിരുത്തുകയായിരുന്നു . ഇതിനെ തുടര്‍ന്ന് വിവിധകോണുകളില്‍ നിന്നും അഭിനന്ദനവും അത് പോലെ തന്നെ വിമര്‍ശവുമാണ് മഞ്ജുവിന് ലഭിച്ചത് . ഇതിനെല്ലാം പിന്നാലെയാണ് മന്ത്രിയുടെ പ്രതികരണം .
നടിയെന്ന നിലയില്‍ മഞ്ജുവാരിയരെ ബഹുമാനിക്കുന്നുവെന്നും എന്നാല്‍ മഞ്ജുവാരിയര്‍ സാമൂഹികബോധത്തിന്റെ കണ്ണാടി മാറണമെന്നും വനിതാ മതിലിന് രാഷ്ട്രീയനിറമില്ലെന്നും സുധാകരന്‍ പറഞ്ഞു .
അണിചേരാമെന്ന് പറഞ്ഞ വനിതാ മതിലിനു രാഷ്ട്രീയനിറം വന്നു ചേര്‍ന്നത് അറിഞ്ഞില്ലെന്ന കാരണം പറഞ്ഞായിരുന്നു നടി മഞ്ജുവാരിയരുടെ പിന്മാറ്റം . ഇതിനെത്തുടര്‍ന്ന് മഞ്ജുവിന് എതിരെ വിമര്‍ശനവുമായി മന്ത്രി മേഴ്സിക്കുട്ടിയമ്മയും , മന്ത്രി എം.എം മണിയും രംഗത്ത് എത്തിയിരുന്നു .
മഞ്ജുവാരിയരെ കണ്ടുകൊണ്ടല്ല വനിതാമത്തില്‍ സംഘടിപ്പിക്കുന്നതെന്നും വനിതാമതിലിനു എന്ത് രാഷ്ട്രീയമാണ് ഉള്ളതെന്ന് മഞ്ജുവ്യക്തമാക്കണമെന്നും മേഴ്സികുട്ടിയമ്മ പറഞ്ഞു .
മഞ്ജുവാരിയര്‍ പങ്കെടുത്തില്ലാ എന്നുവെച്ച് വനിതാ മതിലിന് യാതൊരു ക്ഷീണവുമുണ്ടാകില്ലയെന്ന് എം.എം മണി പറഞ്ഞു . കലാകാരിയെന്ന നിലയില്‍ അവര്‍ക്ക് ഇഷ്ടമുള്ള തീരുമാനം എടുക്കാം . ഒരാളെയും ആശ്രയിച്ചല്ല പ്രവര്‍ത്തനങ്ങള്‍ മുന്നോട്ടു പോവുന്നതെന്നും എം.എം മണി പറഞ്ഞു .
Discussion about this post