രാജ്യത്ത് കോണ്‍ഗ്രസിന്റെ ഭരണ കാലത്തെല്ലാം ഉണ്ടായിരുന്ന പ്രധാനമന്ത്രിമാര്‍ സവര്‍ണരായിരുന്നുവെന്ന് എല്‍.ജെ.പി നേതാവും കേന്ദ്ര മന്ത്രിയുമായ രാം വിലാസ് പാസ്വാന്‍ അഭിപ്രായപ്പെട്ടു. മുന്‍ പ്രധാനമന്ത്രി മന്‍മോഹന്‍ സിംഗിന്റെ ജാതി തനിക്കറിയില്ലെന്നും അദ്ദേഹം പറഞ്ഞു. മുന്നോക്ക സമുദായത്തില്‍ പിന്നോക്കം നില്‍ക്കുന്നവര്‍ക്ക് സംവരണം ഏര്‍പ്പെടുത്തിക്കൊണ്ടുള്ള ബില്ലിനെപ്പറ്റി സംസാരിക്കുകയായിരുന്നു അദ്ദേഹം. ഇങ്ങനെയൊരു സംവരണത്തെപ്പറ്റി എന്തുകൊണ്ട് കോണ്‍ഗ്രസ് ചിന്തിച്ചില്ലെന്ന് അദ്ദേഹം ചോദിച്ചു.
മുന്നോക്ക് വിഭാഗക്കാരില്‍ സാമ്പത്തികമായി പിന്നോക്കം നില്‍ക്കുന്നവര്‍ക്ക് പത്ത് ശതമാനം സംവരണം ഏര്‍പ്പെടുത്തിക്കൊണ്ടുള്ള ബില്ലായിരുന്നു ബുധനാഴ്ച പാര്‍ലമെന്റില്‍ പാസായത്. അഞ്ച് ഏക്കറില്‍ താഴെ കൃഷിഭൂമിയും എട്ട് ലക്ഷം രൂപയില്‍ താഴെ വാര്‍ഷിക വരുമാനവുമുള്ള മുന്നോക്കക്കാര്‍ക്കാണ് ആനുകൂല്യം ലഭിക്കുക.
ലോക്‌സഭയില്‍ 323 വോട്ടുകളുടെ ഭൂരിപക്ഷത്തോടെയാണ് ബില്‍ പാസായത്. അതേസമയ രാജ്യസഭയില്‍ ഏഴിനെതിരെ 165 വോട്ടുകളുടെ ഭൂരിപക്ഷത്തിലാണ് ബില്‍ പാസായത്. പ്രസിഡന്റ് രാം നാഥ് കോവിന്ദ് ബില്ലില്‍ ഒപ്പിടാല്‍ അത് നിയമമായി മാറുന്നതായിരിക്കും.
Discussion about this post