വരാനിരിക്കുന്ന ലോക്‌സഭാ തിരഞ്ഞെടുപ്പില്‍ കര്‍ണാടക മുഖ്യമന്ത്രിയും ജെ.ഡി.എസ് നേതാവുമായ എച്ച്.ഡി.കുമാരസ്വാമി തന്റെ പിന്തുണ തൃണമൂല്‍ കോണ്‍ഗ്രസ് നേതാവ് മമതാ ബാനര്‍ജിക്ക് നല്‍കിയിരിക്കുകയാണ്. മമതാ ബാനര്‍ജി വളരെ നല്ല ഭരണാധികാരിയാണെന്നും രാജ്യത്തെ നയിക്കാന്‍ പറ്റുന്ന ഒരു നേതാവാണെന്നും അ്‌ദ്ദേഹം പറഞ്ഞു. കര്‍ണാടകയില്‍ സഖ്യകക്ഷിയായ കോണ്‍ഗ്രസിന് അദ്ദേഹം ദേശീയ തലത്തില്‍ പിന്തുണ നല്‍കിയിട്ടില്ല.
നിലവിലെ അവസ്ഥ 1977ന് സമാനമാണെന്ന് അദ്ദേഹം പറഞ്ഞു. അന്ന് പ്രധാനമന്ത്രിയായിരുന്നു ഇന്ദിരാ ഗാന്ധിക്കെതിരെ വിവിധ കോണുകളില്‍ നിന്നും പ്രതിഷേധം ഉയര്‍ന്ന് വന്നിരുന്നുവെന്നും അതേ രീതിയിലാണ് ഇപ്പോള്‍ കാര്യങ്ങള്‍ പോകുന്നതെന്നും അദ്ദേഹം പറഞ്ഞു.
നരേന്ദ്ര മോദിയുടെ ഭരണത്തില്‍ രാജ്യത്തെ ജനങ്ങള്‍ ബുദ്ധിമുട്ടിയിരിക്കുകയാണെന്ന് അദ്ദേഹം ചൂണ്ടിക്കാട്ടി. എന്നാല്‍ തിരഞ്ഞെടുപ്പിന് മുന്‍പ് തന്നെ മഹാസഖ്യം ഒരു നേതാവിനെ ഉയര്‍ത്തിപ്പിടിക്കണമെന്ന അഭിപ്രായം കുമാസ്വാമിക്കില്ല. തിരഞ്ഞെടുപ്പിന് ശേഷം എല്ലാവരും കൂടിയിരുന്ന് ഒരു നേതാവിനെ തിരഞ്ഞെടുക്കുമെന്നും അദ്ദേഹം പറഞ്ഞു.
രാജ്യത്തെ നിരവിധി സംസ്ഥാനങ്ങള്‍ക്ക് അവരവരുടേതായ പ്രശ്‌നങ്ങളുണ്ടെന്നും ഇവിടെയുള്ള പാര്‍ട്ടിയിലെ പ്രാദേശിക നേതാക്കന്മാര്‍ ദേശീയ തലത്തിലെ പാര്‍ട്ടികളുടെ അംഗങ്ങളുടെ അത്ര തന്നെ ശക്തരാണെന്ന് അദ്ദേഹം വിലയിരുത്തി. പ്രാദേശിക പാര്‍ട്ടികള്‍ വരാനിരിക്കുന്ന തിരഞ്ഞെടുപ്പില്‍ വലിയ പങ്ക് വഹിക്കുമെന്നും അദ്ദേഹം പറഞ്ഞു.
ജനുവരി 20ന് മമതാ ബാനര്‍ജിയുടെ നേതൃത്വത്തില്‍ കൊല്‍ക്കത്തയില്‍ പ്രതിപക്ഷ പാര്‍ട്ടികളുടെ യുണൈറ്റഡ് ഇന്ത്യാ റാലി സംഘടിപ്പിച്ചിരുന്നു. 22 പ്രതിപക്ഷ പാര്‍ട്ടികളുടെ നേതാക്കന്മാര്‍ പരിപാടിയില്‍ പങ്കെടുത്തിരുന്നു.
Discussion about this post