തിരഞ്ഞെടുപ്പിന് മുന്നോടിയായി ഇന്ന് തൃശൂരില്‍ ബി.ജെ.പിയുടെ കോര്‍കമ്മിറ്റി യോഗം നടന്നു. എല്ലാ മണ്ഡലത്തിലും പ്രമുഖരെ മത്സരിപ്പിക്കുമെന്ന് ബി.ജെ.പി സംസ്ഥാന ജനറല്‍ സെക്രട്ടറി കെ.സുരേന്ദ്രന്‍ യോഗത്തിന് ശേഷം വ്യക്തമാക്കി. ഫെബ്രുവരി രണ്ടാം വാരത്തോടെ അന്തിമ സ്ഥാനാര്‍ത്ഥി പട്ടിക തയ്യാറാകുമെന്നും ഫെബ്രുവരി 5ന് മുമ്പ് എല്ലാ ബൂത്തിലും തിരഞ്ഞെടുപ്പ് കമ്മിറ്റി രൂപീകരിക്കുമെന്നും അദ്ദേഹം പറഞ്ഞു.
പ്രചാരണത്തിന്റെ ഭാഗമായി ദേശീയ അധ്യക്ഷന്‍ അമിത് ഷാ അടക്കമുള്ള നേതാക്കള്‍ അടുത്ത മാസം മുതല്‍ പ്രചാരണത്തിനെത്തുമെന്നും കെ.സുരേന്ദ്രന്‍ അറിയിച്ചു. കൂടാതെ ‘എന്റെ കുടുംബം ബി.ജെ.പി കുടുംബം’ പ്രചാരണ പരിപാടിയും നടത്തുന്നതായിരിക്കും.
സംസ്ഥാന സര്‍ക്കാര്‍ ജനങ്ങള്‍ക്ക് നേരെ അങ്ങേയറ്റം ക്രൂരമായ നിലപാടാണ് എടുക്കുന്നതെന്നും കെ.സുരേന്ദ്രന്‍ കുറ്റപ്പെടുത്തി. കേന്ദ്ര സര്‍ക്കാര്‍ പ്രളയത്തിന് ശേഷം നല്‍കിയ സഹായത്തില്‍ നിന്നും 1,000 കോടി രൂപ സംസ്ഥാന സര്‍ക്കാരിന്റെ അനാസ്ഥ മൂലം നഷ്ടമായെന്നും അദ്ദേഹം പറഞ്ഞു. കൂടാതെ ശബരിമല വിഷയത്തില്‍ ഭക്തരെ മുള്‍മുനയില്‍ നിര്‍ത്തിയ സര്‍ക്കാര്‍ വീണ്ടും ആചാരലംഘനത്തിന് ശ്രമിക്കുന്നുണ്ടെന്നും കെ.സുരേന്ദ്രന്‍ പറഞ്ഞു. കുംഭ മാസത്തില്‍ നട തുറക്കുമ്പോള്‍ ആചാരലംഘനത്തിന് ശ്രമിക്കുകയാണെങ്കില്‍ ആ ശ്രമത്തെ പല്ലും നഖവുമുപയോഗിച്ച് നേരിടുമെന്നും അദ്ദേഹം വ്യക്തമാക്കി.
Discussion about this post