സ്ത്രീകള്‍ വീട്ടിലിരിക്കണമെന്ന് ഒരു വേദങ്ങളിലും പറഞ്ഞിട്ടില്ലെന്ന് ഉപരാഷ്ട്രപതി വെങ്കയ്യ നായിഡു. ഇന്ത്യയെ മാതൃരാജ്യമെന്നാണ്, പിതൃരാജ്യമെന്നല്ല പറയുന്നത്. സ്ത്രീകളെ ബഹുമാനിക്കുന്ന സംസ്‌കാരമാണ് നമ്മുടേതെന്നും വെങ്കയ്യ നായിഡു വ്യക്തമാക്കി.
സര്‍വ്വകലാശാലകളിലും മറ്റും സ്വര്‍ണമെഡലുകള്‍ നേടുന്ന പെണ്‍കുട്ടികളെ കാണുമ്പോള്‍ അഭിമാനം തോന്നാറുണ്ട്. നമ്മളെല്ലാം സഹോദരീ സഹോദരന്മാരാണെന്ന ബോധം കുട്ടികളില്‍ വളര്‍ത്തിയെടുക്കണമെന്നും അദ്ദേഹം കൂട്ടിച്ചേര്‍ത്തു.
കോട്ടയത്ത് അഖില കേരള ബാലജനസഖ്യത്തിന്റെ നവതി ആഘോഷങ്ങള്‍ ഉദ്ഘാടനം ചെയ്ത ശേഷമായിരുന്നു ഉപരാഷ്ട്രപതിയുടെ വാക്കുകള്‍.
‘അഹം ബ്രഹ്മാസ്മി’ എന്നതാണ് ഇന്ത്യയുടെ തത്വശാസ്ത്രം. ഏതു മതത്തില്‍ വിശ്വസിക്കുന്നതിലും എത് ദൈവത്തെ ആരാധിക്കുന്നതിലും രാജ്യത്ത് ഒരു എതിര്‍പ്പുമില്ല. ഏവരെയും ഉള്‍ക്കൊള്ളുന്നതാണ് ഇന്ത്യയുടെ സംസ്‌കാരം. രാജ്യത്തിന്റെ സംസ്‌കാരം സംരക്ഷിക്കുന്നതിലും പ്രചരിപ്പിക്കുന്നതിലും ശ്രദ്ധ വേണം. ഇക്കാലത്ത് എല്ലാവരും എന്തിനും ഏതിനും ഗൂഗിളിനോടാണ് ചോദിക്കുന്നത്. എന്നാല്‍ ഗൂഗിളല്ല ഗുരുവാണ് അതിനേക്കാള്‍ വലുത്. ലോകത്തില്‍ എവിടെ പോയി പഠിച്ചാലും മാതൃരാജ്യത്തെയും മാതൃഭാഷയെയും മറക്കരുതെന്നും അദ്ദേഹം കൂട്ടിച്ചേര്‍ത്തു.
ഉദ്ഘാടനത്തിന് ശേഷം മലയാളത്തില്‍ പ്രസംഗം ആരംഭിച്ചാണ് അദ്ദേഹം സദസിനെ കൈയ്യിലെടുത്തത്.
Discussion about this post