വയനാട് മാനന്തവാടിയില് പ്രായപൂര്ത്തിയാകാത്ത ആദിവാസി പെണ്കുട്ടിയെ പീഡിപ്പിച്ച കേസില് പ്രതിയായ കോണ്ഗ്രസ് നേതാവ് ഒ.എം.ജോര്ജ് പോലീസിന് മുന്നില് കീഴടങ്ങി. മാനന്തവാടി സ്പെഷ്യല് മൊബൈല് സ്ക്വാഡ് ഡി.വൈ.എസ്.പിക്ക് മുന്നിലാണ് വയനാട് ഡി.സി.സി അംഗവും ബത്തേരി മുന് പഞ്ചായത്ത് പ്രസിഡന്റുമായിരുന്ന ഒ.എം.ജോര്ജ് കീഴടങ്ങിയത്.
പീഡന പരാതി വന്നതോടെ ഒ.എം.ജോര്ജ് ഒളിവിലായിരുന്നു. പോക്സോ നിയമപ്രകാരമായിരുന്നു പോലീസ് കേസെടുത്തത്.
15 വയസ്സ് മുതല് ഒന്നര വര്ഷത്തോളം തന്നെ ഒ.എം.ജോര്ജ് പീഡിപ്പിച്ചിരുന്നുവെന്ന് പെണ്കുട്ടി കോടതിയില് രഹസ്യമൊഴി നല്കിയിരുന്നു. ബലാത്സംഗം നടന്ന വിവരം പുറത്തറിയിച്ചാല് കൊന്നുകളയുമെന്ന് ഒ.എം.ജോര്ജ് ഭീഷണിപ്പെടുത്തിയെന്ന് പെണ്കുട്ടി പറയുന്നു. പെണ്കുട്ടിയുടെ നഗ്ന ചിത്രങ്ങളെടുത്ത് സമൂഹ മാധ്യമങ്ങളിലിടുമെന്ന് പറഞ്ഞും ഒ.എം.ജോര്ജ് ഭീഷണിപ്പെടുത്തിയിരുന്നു. മാതാപിതാക്കള് വിവരമറിഞ്ഞതോടെ പെണ്കുട്ടി ആത്മഹത്യ ചെയ്യാനും തീരുമാനിച്ചിരുന്നു.
അമ്മയുടെ പിന്തുണയിലാണ് പെണ്കുട്ടി പരാതി നല്കാന് തീരുമാനിച്ചത്. പെണ്കുട്ടിയുടെ മൊഴിയുടെ അടിസ്ഥാനത്തില് ജോര്ജിന്റെ വീട്ടിലും പെണ്കുട്ടി താമസിക്കുന്ന സ്ഥലത്തും പോലീസ് പരിശോധന നടത്തി. നിരവധി തവണ പെണ്കുട്ടി പീഡനത്തിനിരയായിട്ടുണ്ടെന്ന് വൈദ്യപരിശോധനയില് വ്യക്തമായിട്ടുണ്ട്.
ഇതിനിടയില് കേസ് ഒത്തുതീര്പ്പാക്കാന് ജോര്ജ് ശ്രമിച്ചിരുന്നുവെന്നും റിപ്പോര്ട്ടുകളുണ്ട്.
Discussion about this post