ഹിന്ദു തീര്‍ത്ഥാടകരെ മുറിവേല്‍പിച്ചാല്‍ ഹജ്ജ് തീര്‍ത്ഥാടകര്‍ ദൂഷ്യഫലം അനുഭവിക്കുമെന്ന് സ്വാധി പ്രാചി. അമര്‍നാഥ് തീര്‍ഥാടകര്‍ക്ക് നേരെ പാകിസ്ഥാന്‍ തീവ്രവാദഗ്രൂപ്പിന്റെ ആക്രമണഭീഷണിയുണ്ടെന്ന ഇന്റലിജന്‍സ് റിപ്പോര്‍ട്ട് പുറത്തുവന്നതിന് പിറകെ പ്രതികരണവുമായി സാധ്വി പ്രാചി രംഗത്തെത്തിയത്..
‘എന്തുകൊണ്ടാണ് ഹിന്ദു ഭക്തര്‍ക്ക് നേരെ എന്നും അവരുടെ തീര്‍ഥാടനത്തിനിടെ ഭീഷണിയുണ്ടാകുന്നത്.. അത് അമര്‍നാഥ് യാത്രയിലായാലും വൈഷ്‌ണോ ദേവി/പുരി ജഗന്നാഥ ക്ഷേത്ര യാത്രയിലായാലും എല്ലാം അവസ്ഥ അതുതന്നെയാണ്. ഇനി അത്തരം എന്തെങ്കിലും ആക്രമണമുണ്ടായാല്‍ അതിന്റെ അനന്തരഫലം അനുഭവിക്കുക ഹജ്ജ് യാത്രികരായിരിക്കുമെന്നാണ് എനിക്ക് നിങ്ങളോട് പറയാനുള്ളത്’ സ്വാധി പ്രാചി മുസഫനഗറില്‍ പറഞ്ഞു.
ഇന്ത്യയിലെ ഹജ്ജ് തീര്‍ഥാടകരുടെ കാര്യമാണോ പറയുന്നതെന്ന മാധ്യമപ്രവര്‍ത്തരുടെ ചോദ്യത്തിന് അല്ലെന്നും ജിദ്ദയിലുള്ളവരെയാണ് താന്‍ ഉദ്ദേശിച്ചതെന്നും സ്വാധി വിശദീകരിച്ചു. ‘ഹജ്ജ് തീര്‍ഥാടകര്‍ അഭിമുഖീകരിക്കാന്‍ പോകുന്ന ദൂഷ്യങ്ങള്‍ എന്തെല്ലാമെന്ന് കാലം അവരോട് പറയുമെന്നും പ്രാചി പറഞ്ഞു.
‘പാവപ്പെട്ട ഹിന്ദു തീര്‍ഥാടകര്‍ അവരുടെ ദൈവത്തെ കാണാനായി പോകുകയാണ്. അവര്‍ എന്തെങ്കിലും നശിപ്പിക്കുകയോ കട്ടെടുക്കുകയോ ചെയ്തിട്ടില്ല. ഭക്തിയും വിശ്വാസവും മാത്രമായാണ് അവര്‍ പോകുന്നത്.’ സ്വാധി പ്രാചി പറഞ്ഞു.
അതേസമയം വിവാദ പ്രസ്താവന നടത്തുന്ന സ്വാധി പ്രാചി ബിജെപി അംഗമല്ലെന്ന് ബിജെപി ഉത്തര്‍പ്രദേശ് ഘടകം പ്രസിഡണ്ട് ലഷ്മികാന്ത് ബാജ്‌പേയ് പറഞ്ഞു. മൊബൈല്‍ വഴി പ്രാച്ചി ബിജെപിയില്‍ അംഗത്വ അപേക്ഷ നല്‍കിയിട്ടുണ്ട്. അത് ഇപ്പോഴും പരിശോധനയിലാണ്. കേന്ദ്രനേതൃത്വത്തിന് ഇത് സംബന്ധിച്ച് റിപ്പോര്‍ട്ട് നല്‍കിയിട്ടുണ്ട്. നേതൃത്വം ഇക്കാര്യത്തില്‍ അന്തിമ തീരുമാനം എടുക്കുമെന്നും ബാജ്‌പേയ് പറഞ്ഞു.
വികസനത്തിനായി എല്ലാവരെയും ഒരുമിച്ച് കൊണ്ടു പോകുന്ന ബിജെപിയുടെ പ്രതിഛായ തകര്‍ക്കുന്നതാണ് ഇത്തരം പ്രസ്താവനകളെന്ന് ബിജെപി നേതാക്കള്‍ പ്രതികരിച്ചു
Discussion about this post