ഡല്‍ഹി:പൊതു ഖജനാവില്‍ നിന്നുളള പണം നല്ല രീതിയില്‍ ഉപയോഗിക്കണമെന്നും ജനങ്ങള്‍ക്ക് സൗജന്യങ്ങള്‍ നല്‍കി തീര്‍ക്കരുതെന്നും സുപ്രീം കോടതി ഡല്‍ഹി സര്‍ക്കാറിനോട് ആവശ്യപ്പെട്ടു. ഡല്‍ഹി മെട്രോ ഉള്‍പ്പടെ പൊതു ഗതാഗത മേഖലകളില്‍ സ്ത്രീകള്‍ക്ക് സൗജന്യ യാത്ര അനുവദിക്കുന്നതിനെ ചോദ്യം ചെയ്ത ഹര്‍ജിയിലാണ് സുപ്രീം കോടതിയുടെ ഇടപെടല്‍. സ്ത്രീകള്‍ക്ക് സൗജന്യ യാത്ര നല്‍കാനുള്ള പദ്ധതി ഡി.എം.ആര്‍.സിക്ക് ഗുണം ചെയ്യില്ലെന്നും സുപ്രീം കോടതി നിരീക്ഷിച്ചു.ജസ്റ്റിസ് അരുണ്‍ മിശ്ര, ദീപക് ഗുപ്ത എന്നിവരുള്‍പ്പെട്ട ബെഞ്ചിന്റേതാണ് നിര്‍ദേശം.
ഡല്‍ഹി മെട്രോ റെയില്‍ കോര്‍പ്പറേഷന്റെ സാമ്പത്തിക ആരോഗ്യം എ.എ.പി സര്‍ക്കാര്‍ ഉറപ്പുവരുത്തേണ്ടതുണ്ട്. നഷ്ടങ്ങള്‍ ഉണ്ടാക്കുന്ന ഒരു നടപടിയുമെടുക്കരുതെന്നും കോടതി നിര്‍ദേശിച്ചു.
ഡല്‍ഹിയിലെ പൊതുഗതാഗത സംവിധാനങ്ങളില്‍ സ്ത്രീകള്‍ക്ക് സൗജന്യമായി യാത്ര ചെയ്യാമെന്ന് ജൂണിലാണ് മുഖ്യമന്ത്രി അരവിന്ദ് കെജ്രിവാള്‍ പ്രഖ്യാപിച്ചത്. ലോക്‌സഭാ തെരഞ്ഞെടുപ്പില്‍ ഡല്‍ഹിയിലെ ഏഴു സീറ്റുകളിലും ആം ആദ്മി പാര്‍ക്ക് തിരിച്ചടി നേരിട്ട സാഹചര്യത്തിലാണ് ഇത്തരമൊരു പ്രഖ്യാപനവുമായി കെജ്രിവാള്‍ രംഗത്തെത്തിയത്.ഇത് നടപ്പിലാക്കുമ്പോള്‍ സംസ്ഥാന സര്‍ക്കാറിന് ഒരു വര്‍ഷം 700 കോടിയുടെ ബാധ്യത വരുമെന്നും കെജ്രിവാള്‍ അറിയിച്ചിരുന്നു. മൂന്ന് മാസത്തിനുള്ളില്‍ പദ്ധതി നടപ്പിലാക്കാന്‍ കഴിയുമെന്നായിരുന്നു അന്നത്തെ പ്രഖ്യാപനം.
Discussion about this post