ഡല്‍ഹി: ഇന്ത്യയുടെ ആഭ്യന്തര വിഷയങ്ങളില്‍ അഭിപ്രായം പറയാതെ സ്വന്തം രാജ്യത്തെ ന്യൂനപക്ഷങ്ങളുടെ കാര്യത്തില്‍ ശ്രദ്ധചെലുത്തണമെന്ന് പാകിസ്ഥാനോട് ഇന്ത്യ. പാകിസ്ഥാന്റെ എല്ലാ പ്രസ്താവനകള്‍ക്കും മറുപടി പറയേണ്ട ആവശ്യം ഇന്ത്യയ്ക്കില്ല. പാകിസ്ഥാന്റെ എല്ലാ പ്രസ്താവനകളും അനാവശ്യമാണെന്നും ഇന്ത്യന്‍ വിദേശകാര്യ വക്താവ് രവീഷ് കുമാര്‍ പറഞ്ഞു. പാകിസ്ഥാനില്‍ ന്യൂനപക്ഷങ്ങള്‍ അനുഭവിക്കുന്ന ദുരിതങ്ങള്‍ എന്താണെന്ന് ലോകത്തിന് മുഴുവന്‍ അറിയാമെന്നും അദ്ദേഹം പറഞ്ഞു.
അവരുടെ കഷ്ടതകള്‍ അവസാനിപ്പിക്കാനാണ് പാകിസ്ഥാന്‍ ശ്രമിക്കേണ്ടത്. അല്ലാതെ ഇന്ത്യയുടെ ആഭ്യന്തര കാര്യങ്ങളില്‍ അഭിപ്രായം പറയുകയല്ല വേണ്ടതെന്നും രവീഷ് കുമാര്‍ പറഞ്ഞു. ദേശീയ പൗരത്വ ഭേദഗതി ബില്ലിനെതിരെ പാക് പ്രധാനമന്ത്രി ഇമ്രാന്‍ ഖാന്‍ നടത്തിയ പ്രസ്താവനയിലാണ് ഇന്ത്യയുടെ മറുപടി.
പൗരത്വ ഭേദഗതി ബില്‍ രാജ്യസഭ പാസാക്കിയതിന് പിന്നാലെയാണ് ട്വിറ്ററിലൂടെ ഇമ്രാന്‍ ഖാന്‍ രംഗത്തെത്തിയത്. ഹിന്ദു മേധാവിത്വ അജണ്ട നടപ്പിലാക്കാനുള്ള ആസൂത്രിത ശ്രമമാണ് നരേന്ദ്ര മോദി നടത്തുന്നത് എന്നാണ് ഇമ്രാന്‍ ഖാന്‍ ട്വിറ്ററിലൂടെ പറഞ്ഞത്. ഇതിന് പിന്നാലെയാണ് ചുട്ടമറുപടിയുമായി ഇന്ത്യ രംഗത്ത് വന്നത്.
Discussion about this post