ഡല്‍ഹി: പൗരത്വ ഭേദഗതി നിയമത്തിന്റെ പേരില്‍ സംസ്ഥാന സര്‍ക്കാരും സിപിഎമ്മും ഗവര്‍ണര്‍ ആരിഫ് മുഹമ്മദ് ഖാനെ വിരട്ടിയോടിക്കാന്‍ സര്‍വ്വ സന്നാഹങ്ങളും പുറത്തെടുക്കുകയാണെന്നും അദ്ദേഹത്തെ കേരളത്തില്‍ നിന്ന് ഓടിക്കാമെന്ന മനപ്പായസം ആരും ഉണ്ണേണ്ടെന്നും കേന്ദ്ര വിദേശകാര്യ സഹമന്ത്രി വി മുരളീധരന്‍.
കേരളം സിപിഎമ്മിന്റെ തറവാട്ടു സ്വത്താണെന്ന് ആരും കരുതേണ്ട. ഇതല്ല, ഇതിലും വലിയ തടയലും വെല്ലുവിളിയും നടത്തിയാലും ഗവര്‍ണര്‍ ഇവിടെ തന്നെ കാണും. നിയമസഭയുടെ അധികാരങ്ങളില്‍ ഇടപെടാന്‍ ഗവര്‍ണര്‍ക്ക് അവകാശമില്ലെന്ന് പറയാന്‍ നിയമം ഉദ്ധരിക്കുന്ന കോടിയേരി ബാലകൃഷ്ണന്‍ ഗവര്‍ണര്‍ പ്രമേയത്തെ എതിര്‍ത്തതിന് പിന്നിലെ കാരണം മനസിലാക്കാന്‍ നിയമോപദേശം തേടുന്നത് നന്നായിരിക്കുമെന്നും അദ്ദേഹം പറഞ്ഞു.
രാജീവ് ഗാന്ധി മന്ത്രിസഭയില്‍ നിന്ന് രാജിവച്ചിറങ്ങി വന്നയാളാണ് ആരിഫ് മുഹമ്മദ് ഖാന്‍. ദേശീയ വാദിയായ മുസ്ലീമായി സര്‍വ്വരും അംഗീകരിക്കുന്ന അദ്ദേഹവുമായി വര്‍ഗ്ഗീയ വാദി മുസ്ലീങ്ങളും അവരുടെ പിന്തുണയില്‍ വോട്ടു നേടുന്നവരും തമ്മില്‍ ഏറ്റുമുട്ടുന്നതാണ് കാണുന്നത്. ദേശീയ വാദി മുസ്ലീമിനൊപ്പമാണോ വര്‍ഗീയ വാദി മുസ്ലീമിനൊപ്പമാണോ ഇടതുപക്ഷവും കോണ്‍ഗ്രസ്സും നില്‍ക്കുന്നതെന്ന് അറിയാന്‍ കേരളത്തിലെ ജനങ്ങള്‍ക്ക് താത്പര്യമുണ്ടെന്നും വി മുരളീധരന്‍ കൂട്ടിച്ചേര്‍ത്തു.
Discussion about this post