ഐ.എസ്.ആര്‍.ഒ യുടെ ചരിത്രത്തില്‍ മറ്റൊരു സുവര്‍ണ്ണാദ്ധ്യായം കുറിച്ചുകൊണ്ട് ഇന്ത്യയുടെ അതിശക്ത വാര്‍ത്താവിനിമയ ഉപഗ്രഹം ജിസാറ്റ്30 ഭ്രമണപഥത്തിലെത്തി. തെക്കേ അമേരിക്കയിലെ കൌരു എന്ന ഫ്രഞ്ച് അധീനപ്രദേശത്തുള്ള ഉപഗ്രഹവിക്ഷേപണകേന്ദ്രത്തില്‍ നിന്നാണ് ജിസാറ്റ്-30 വിക്ഷേപിച്ചത്. ആരിയേന്‍ (Ariane) എന്ന ഫ്രഞ്ച് കമ്പനിയുടേ അരിയേന്‍-5 എന്ന റോക്കറ്റിലാണ് ജിസാറ്റ-്30 വിക്ഷേപിച്ചത്.
പന്ത്രണ്ട് കെ യു(Ku) ബാന്‍ഡ് ട്രാന്‍സ്‌പോണ്ടറുകളും പന്ത്രണ്ട് സി ബാന്‍ഡ് ട്രാന്‍സ്‌പോണ്ടറുകളും ഉള്ള ഈ ഉപഗ്രഹം ഇന്ത്യ കൂടാതെ മുഴുവന്‍ ഏഷ്യ, ആസ്‌ട്രേലിയ പ്രദേശത്തും വാര്‍ത്താവിനിമയം നടത്താന്‍ ശക്തിയുള്ളതാണ്. അതീവഗുണമേന്മയുള്ള ടെലിവിഷനും, വാര്‍ത്താവിനിമയത്തിനും ഈ ഉപഗ്രഹം വഴി കഴിയും.
ഇന്ത്യന്‍ സമയം 2:35നാണ് ഉപഗ്രഹം വിക്ഷേപിക്കപ്പെട്ടത്. ബെംഗലുരുവിലെ യു ആര്‍ റാവു ഉപഗ്രഹ കേന്ദ്രത്തിന്റെ ഡയറക്ടര്‍ പി കുഞ്ഞികൃഷ്ണന്‍ വിക്ഷേപണത്തിന്റെ ഭാഗമായി കൌരുവിലെത്തിയിരുന്നു. അരിയന്‍ എന്ന കമ്പനിയുമായി ചേര്‍ന്ന് വിക്ഷേപിയ്ക്കുന്ന 24 ാം ഉപഗ്രഹമാണ് ജിസാറ്റ് 30.
2005ല്‍ നാം ഭ്രമണപഥത്തിലെത്തിച്ച ഇന്‍സാറ്റ്4-എ എന്ന ഉപഗ്രഹത്തിന്റെ മിക്ക ജോലികളും ഇനി കൂടുതല്‍ ശക്തിയുള്ള ജിസാറ്റ്-30 ആവും ചെയ്യുക. ഇതോടെ ശക്തിയേറിയ വാര്‍ത്താവിനിമയസൌകര്യങ്ങള്‍ ഇന്ത്യയില്‍ ലഭിയ്ക്കും. പന്ത്രണ്ട് കൊല്ലം കാലാവധി നിശ്ചയിച്ചിരുന്ന ഇന്‍സാറ്റ്-4എ കഴിഞ്ഞ പതിമൂന്നു കൊല്ലമായി ഒരു കുഴപ്പവുമില്ലാതെ പണിയെടുക്കുന്നുണ്ട്.
