കൊൽക്കത്ത: പൗരത്വ ഭേദഗതി നിയമത്തെ അനുകൂലിച്ച് ബംഗാളിൽ നടന്ന പടുകൂറ്റൻ റാലിക്ക് ബിജെപി നേതൃത്വം നൽകി. നുഴഞ്ഞു കയറ്റക്കാരെയും അനധികൃത കുടിയേറ്റക്കാരെയും നാടു കടത്തുമെന്ന് ബിജെപി പശ്ചിമ ബംഗാൾ അദ്ധ്യക്ഷൻ ദിലീപ് ഘോഷ് റാലിയിൽ പറഞ്ഞു. നുഴഞ്ഞു കയറ്റക്കാരെ അനുകൂലിക്കുന്നവരെയും ബംഗ്ലാദേശിലേക്ക് നാടു കടത്തണമെന്നും അദ്ദേഹം അഭിപ്രായപ്പെട്ടു.
ആയിരക്കണക്കിന് ഹിന്ദുക്കളാണ് ബംഗ്ലാദേശിൽ നിന്നും ആട്ടിപ്പായിക്കപ്പെട്ടു കൊണ്ടിരിക്കുന്നത്. മതപീഡനം അനുഭവിക്കുന്ന അവർക്ക് പൗരത്വം നൽകുന്നതിനെ മമത ബാനർജി അടക്കമുള്ളവർ എതിർക്കുന്നത് എന്തിനാണെന്ന് മനസ്സിലാകുന്നില്ല. അതേസമയം അവർക്ക് കൂടി അവകാശപ്പെട്ട വിഭവങ്ങളാണ് നുഴഞ്ഞു കയറ്റക്കാർ കൊണ്ടു പോകുന്നത്. തൃണമൂലും ഇടത് പക്ഷവും ഇതിന് മൗനാനുവാദം നൽകുകയാണ്. ദിലീപ് ഘോഷ് വ്യക്തമാക്കി.
ബംഗാളിൽ നിലവിൽ ഒരു കോടിക്കടുത്ത് നുഴഞ്ഞു കയറ്റക്കാരുണ്ട്. അവർക്ക് ഈ രാജ്യത്ത് സ്ഥാനമില്ല. അവരെ അനുകൂലിക്കുന്നവർക്കും ഈ രാജ്യത്തിന്റെ മനസ്സിൽ സ്ഥാനമില്ല. ദിലീപ് ഘോഷ് കൂട്ടിച്ചേർത്തു.
Discussion about this post