ബാഗ്ദാദ്: ഇറാഖ് തലസ്ഥാനമായ ബാഗ്ദാദിലുള്ള അമേരിക്കന് എംബസിക്കു സമീപം റോക്കറ്റാക്രമണം. അഞ്ച് റോക്കറ്റുകളാണ് എംബസിക്ക് സമീപം ഞായറാഴ്ച രാത്രി പതിച്ചതെന്നാണ് റിപ്പോര്ട്ടുകള്. വിദേശ രാജ്യങ്ങളുടെ എംബസികള് ഉള്പ്പെട്ട അതീവ സുരക്ഷാമേഖലയിലായിരുന്നു റോക്കറ്റാക്രമണം. ഒരാള്ക്ക് പരിക്കേറ്റതായി യുഎസ് ഉദ്യോഗസ്ഥരെ ഉദ്ധരിച്ച് സിഎന്എന് റിപ്പോര്ട്ട് ചെയ്തു.
ബാഗ്ദാദില് അമേരിക്കന് എംബസിക്ക് നേരെ കഴിഞ്ഞദിവസവും റോക്കറ്റ് ആക്രമണം നടന്നിരുന്നു. ബാഗ്ദാദിന് സമീപമുള്ള സഫറാനിയ ജില്ലയില് നിന്ന് തൊടുത്ത മൂന്ന് റോക്കറ്റുകളാണ് എംബസിക്ക് നേരെ വന്ന് പതിച്ചത്. ആക്രമണത്തിന് പിന്നാലെ വ്യോമാക്രമണ മുന്നറിയിപ്പ് സൈറണ് മുഴങ്ങിയതായി വാര്ത്താ ഏജന്സികള് റിപ്പോര്ട്ട് ചെയ്യുന്നു.
ഇറാഖിലെ യുഎസ് സൈനിക സാന്നിധ്യത്തിനെതിരെ 25നു ബാഗ്ദാദില് വന് പ്രതിഷേധ റാലി നടന്നിരുന്നു. ടൈഗ്രിസ് നദിയുടെ പടിഞ്ഞാറന് തീരത്താണ് മിക്ക വിദേശ എംബസികളും സ്ഥിതി ചെയ്യുന്ന ഗ്രീന് സോണ്. ഇവിടെ നിന്ന് വന് മുഴക്കം കേട്ടതായി വിദേശ മാധ്യമപ്രവര്ത്തകരും റിപ്പോര്ട്ട് ചെയ്തു.
അതേസമയം ഇറാന്റെ സൈനിക മേധാവി ജനറല് ഖാസിം സുലൈമാനിയെ ജനുവരി മൂന്നിന് ഇറാഖില് യുഎസ് വ്യോമാക്രമണത്തില് വധിച്ചതിനെത്തുടര്ന്ന് മേഖലയില് സംഘര്ഷാവസ്ഥ തുടരുകയാണ്.
Discussion about this post